काठमाडौँ । ललिता निवासको जग्गा हिनामिना प्रकरणमा सञ्चार तथा सूचना प्रविधिसचिव कृष्णबहादुर राउतको पनि संलग्नता देखिएको छ ।

राउत भौतिक योजना तथा निर्माण मन्त्रालयमा शाखा अधिकृत हुँदा जग्गा सट्टा भर्ना र नक्कली मोहीलाई जग्गा कायम गर्ने सम्बन्धी टिप्पणी उठाएको देखिएको हो ।

माधवकुमार नेपाल प्रधानमन्त्री भएको बेलामा भौतिक योजना तथा निर्माण मन्त्रालयमा आर्थिक प्रशासन शाखामा अधिकृत रहेका राउतले टिप्पणी उठाएको प्रहरीको अनुसन्धानमा देखिएको हो ।

विजयकुमार गच्छदार उपप्रधानमन्त्रीसहित भौतिक योजनामन्त्री, सञ्जयकुमार साह राज्यमन्त्री तथा दीप बस्न्यात सचिव थिए ।

राउतले उठाएको टिप्पणी उठाउने जिम्मा उपसचिवव नरहरि भण्डारीलाई दिइएको थियो । तर उनी सामेल नभएपछि राउतलाई त्यसको जिम्मा दिइएको थियो । राउतले उठाएको टिप्पणीको फाइल सहसचिव, सचिव हुँदै मन्त्रीबाट स्वीकृत भएर मन्त्रिपरिषद्मा पुगी मन्त्रिपरिषद्बाट स्वीकृत भएको थियो । त्यसपछि त्यो जग्गा सट्टाभर्नाको काम सम्पन्न भएको थियो ।

राउतले टिप्पणी उठाएको सही भएको पनि बताएका छन् । उनलाई यस विषयमा अख्तियार दुरुपयोग अनुसन्धान आयोगले यसबारे बयान लिएको थियो । बयानमा सचिव राउतले आफूले टिप्पणी उठाएको सही भएको र यसक्रममा आफू निर्दोष रहेको बताएका थिए ।