दार्चुला । भारतले धौलीगंगा जलविद्युत् परियोजना बाँध खोल्दा महाकाली नदीले तटीय क्षेत्रमा कटान सुरु गरेको छ । भारतको उत्तराखण्ड प्रदेश पिथौरागढ जिल्लाको छिरकिल्लामा रहेको जलविद्युत् परियोजनाको बाध खोलेको हो ।

२८० मेगावाट क्षेत्रको जलविद्युत् परियोजनाको बाँधको सिल्ट सफाइ कार्यका लागि बाँधका ढोकाहरु खोलिएको परियोजनाले जनाएको छ ।

बिहान ५ बजेबाट बाँधका ढोकाहरु खोलिएपछि दार्चुला सदरमुकाम आसपास महाकाली नदीमा साढे ६ बजेबाट पानीको सतह बढेको दार्चुला प्रहरीका डिएसपी तर्कराज पाण्डेले जानकारी दिए ।

महाकाली नगरपालिका–१ र दुहु गाउँपालिका–३ श्रीबगरको बस्तीमुनिबाट नदीले खेतका किनार काट्न थालेको स्थानीय सुरेन्द्रबहादुर बमले बताए ।

आइतबार परियोजना जिल्ला प्रशासन कार्यालयलाई पठाएको जानकारी पत्रमा मंगलबारका दिन बिहान ५ बजेदेखि राति ८ बजेसम्मका लागि बाँधका ढोकाहरु खोलिने जनाएको थियो ।

दार्चुलादेखि बैतडी, डडेल्धुरा, कञ्चनपुर भएर भारततिर बग्ने महाकालीमा पानीको बहाब र सतह बढ्न सक्ने भएका कारण नदी छेउछाउमा नजान र सतर्कता अपनाइ राख्न समेत नेपाल र भारतका स्थानीय प्रशासनले अनुरोध गरेका छन् ।