काठमाडौं । इटालीमा जागिरका लागि पठाइदिने प्रलोभन देखाई बङ्गलादेशी नागरिकहरूलाई काठमाडौं ल्याएर बन्धक बनाउने गिरोहका ७ जना पक्राउ परेका छन् ।

प्रहरीका अनुसार बूढानीलकण्ठ नगरपालिका वडा नं. ८, भङ्गालस्थित एक घर भाडामा लिई ५ जना बङ्गलादेशी नागरिकहरूलाई बन्धक बनाएर राखिएको अवस्थामा प्रहरीले उनीहरूको उद्धार गरेको छ ।

पक्राउ पर्नेमा बङ्गलादेशी नागरिक ३८ वर्षीय आल मामुन, काठमाडौंका३९ वर्षीय बिलाल, २९ वर्षीय रिवन विश्वास, ४३ वर्षीय बाबु हुसेन र ४० वर्षीय यमडी मसिभुर रहमान रहेका छन्। यस्तै, भारतका ४१ वर्षीय सरोजकुमार र नुवाकोट घर भई हाल तारकेश्वर बस्ने ३२ वर्षीय शशि पाठक पनि छन् ।

पक्राउ परेकाहरूमाथि शरीर बन्धक तथा ठगी सम्बन्धी कसुरमा काठमाडौं जिल्ला अदालतबाट ५ दिनको म्याद थप गरी अनुसन्धान सुरू गरिएको जिल्ला प्रहरी परिसर काठमाडौंका प्रवक्ता एसपी पवनकुमार भट्टराईले बताए ।

बङ्गलादेशबाट काठमाडौँ बोलाएर उनीहरूलाई बन्धक बनाई ठगी गरिरहेको सूचनाका आधारमा खटिएको प्रहरी टोलीले छापा मारेको थियो ।