काठमाडौँ । विशेष अदालतले १८ वर्षमा दुई सय ६९ थान मुद्दाको पूर्ण फैसला गरेको छ । आथिर्क वर्ष २०७९/०८० को अन्तिम दिन उसले विशेष अदालतमा पत्रकार सम्मेलन गरेर कुन प्रकृतिका कति मुद्दा पर्छ्यौट भए, कति अझै विचराधीन छन् भन्ने विवरण सार्वजनिक गरेको छ ।

त्यस आधारमा अदालतले अहिलेसम्म २६९ थान मुद्दा पर्छ्यौट गरेको देखिएको हो । अदालतसँग यो बीचमा ६२९ थान मुद्दा दर्ता हुन आएको थियो । अदालतले ४६ प्रतिशत मुद्दा पर्छ्यौट गर्न सफल भएको दावी गरेको छ । अदालतले वार्षिक रुपमा ५० दशमलव ९० प्रतिशत मुद्दा पर्छ्यौट गरिसक्ने लक्ष्य लिएकोमा ४६ प्रतिशत मुद्दा पर्छ्यौट गरेको विवरण सार्वजनिक गरेको हो ।

विशेष अदालत ऐन २०५९ अनुसार २०५९ भाद्र ६ गते विशिष्टिकृत अदालतका रुपमा विशेष अदालत स्थापना भएको थियो । यसलाई भष्ट्राचार निवारण ऐन र सम्पक्ति शुद्धिकरण ऐन २०६४ अनुसार मुद्दा निरुपण गर्ने अधिकार नेपालको संविधानअनुसार रहेको छ । यो अदालतले भष्ट्राचार र सम्पत्ति शुद्धिकरण लगातका विषयमा मात्र मुद्दाको निरुपण गर्ने गरेको छ ।

विशेष अदालतमा दुई वर्ष नाघेका ३२४ थान मुद्दा दर्ता भएको थियो । त्यसमा २१७ मुद्दाको पर्छ्यौट गरेको र १०७ थान मुद्दा अझै विचराधीन अवस्थामा रहेको छ । त्यस्तै, १८ वर्षदेखि दुई वर्षसम्मका ३८ थान मुद्दामा १९ थान मुद्दाको पर्छ्यौट भएको र बाँकी १९ थान मुद्दा विचराधीन रहेको छ ।

एक वर्षदेखि १८ महिनासम्मका ९१ थान मुद्दामा १७ को पर्छ्यौट भएको छ । ७४ मुद्दा अझै अदालतमा विचराधीन अवस्थामा रहेका छन् ।

६ महिनादेखि एक वर्षसम्मका ७७ थान मुद्दा अदालतमा थिए । त्यसमध्ये १५ थान मुद्दा पर्छ्यौट भएको छ । ६२ मुद्दा अझै बाँकी छ । त्यस्तै, ६ महिनाभित्रका ९९ थान मुद्दामा १ थान पर्छ्यौट भएको र ९८ थान मुद्दा बाँकी रहेको अदालतले जानकारी दिएको छ ।

यसरी हेर्दा कूलमा ६२९ थान मुद्दामा २६९ थान मुद्दाको फैसला भएको छ । बाँकी ३६० मुद्दा विशेष अदालतमा विचराधीन छन् । वार्षिक रुपमा ४६ प्रतिशत मुद्दा पर्छ्यौट गर्ने काम सम्पन्न भएको अदालतले पत्रकार सम्मेलन गरेर जानकारी दिएको छ ।

कुन प्रकतिका कति मुद्दा पर्छ्यौट भए ?

विशेष अदालतमा गैरकानुनी सम्पत्तिका ४७ थान मुद्दा दर्ता भएका थिए । त्यसमध्ये १९ थान मुद्दा पर्छ्यौट भएको छ । जसमा ६ थान मुद्दामा पूर्ण ठहर, २ थान मुद्दामा आंशिक ठहर, भएको छ । ११ थान मुद्दामा सफाइको फैसल्ला भएको छ । बाँकी २८ थान मुद्दा विचराधीन अवस्थामा छ ।

त्यसैगरी घुस रिसवततर्फ ११७ थान मुद्दा विशेष अदालतमा थिए । जसमध्ये ५० थान मुद्दाको फैसला आएको छ । त्यसमा २२ थान मुद्दामा ठहर भएको छ । ६ मुद्दामा आंशिक ठहर भएको छ । २२ मुद्दामा सफाइ मिलेको छ । अझै अदालतमा ६७ थान घुस रिसवततर्फका मुद्दा विचराधीन छन् ।

निर्णयगत अनियमिततातर्फ ३७८ मुद्दा विशेष अदालतमा थियो । जसमध्ये १४७ थान मुद्दा पर्छ्यौट भएको छ । जसमध्ये ४७ वटा मुद्दा पूर्ण ठहर भएको छ । ५४ थान मुद्दामा आंशिक ठहर भएको छ । ४६ वटा मुद्दामा सफाइ भएको छ । अझै अदालतसँग २३१ थान मुद्दा निर्णयगत अनियमितताका विचाराधीन अवस्थामा छन् ।

नक्कली प्रमाण पत्रतर्फ ४८ वटा मुद्दा विशेष अदालतमा थिए । जसमध्ये ४० वटा मुद्दाको पर्छ्यौट भएको छ । ४० मध्ये पनि ३७ वटा मुद्दामा ठहर भएको छ । एक वटामा आंशिक ठहर भएको छ । दुई वटा सफाइ भएको छ । त्यसमा एउटाको हदम्यादका कारण सफाइको फैसला अदालतबाट भएको छ ।

अब नक्कली प्रमाण पत्रतर्फ विशेष अदालतमा बाँकी ८ वटा मुद्दा विचाराधीन अवस्थामा छ । सम्पत्ति शुद्धिकरणतर्फ ३९ वटा मुद्दा विशेष अदालतमा दर्ता भएको थियो । जसमध्ये १३ थान मुद्दाको फैसला आइसकेको छ । जसमध्ये पूर्ण ठहर कुनै पनि मुद्दामा भएको छैन । आंशिक ठहरमा भने १२ वटा मुद्दा देखिएका छन् । एक वटा मुद्दामा भने सफाइको फैसला अदालतले गरेको छ । अझै २६ थान सम्पत्ति शुद्धिकरणका मुद्दा विशेष अदालतमा विचाराधीन छ ।

यसरी हेर्दा कूलमा ६२९ मुद्दामध्ये २६९ मुद्दा अदालतले पर्छ्यौट गरेको छ । जसमध्ये ११२ ठहर भएको छ । यो कूलमा ४२ प्रतिशत हो । त्यस्तै ७५ मुद्दामा आंशिक ठहर भएको छ । यो कूलमा २८ प्रतिशत मुद्दा हो । ३० प्रतिशत मुद्दामा भने सफाइ भएको छ ।

अदालतले दिएको विवरणअनुसार विशेषले पर्छ्यौट गरेको मुद्दामध्ये ७० प्रतिशत मुद्दामा कुनै न कुनै रुपमा ठहर भएको छ । ३० प्रतिशतले मात्र सफाइ पाएका छन् ।

फैसला भएका मुद्दामध्ये ४४ थान मुद्दामा मात्रै फैसलाको पूर्ण विवरण आउन बाँकी रहेको अदालतले जनाएको छ । त्यसमध्ये १४ थान मुद्दाको फैसला तयार भइसकेको र त्यसमा हस्ताक्षर गर्न मात्र बाँकी रहेको अदालतले पत्रकार सम्मेलन गरी जानकारी दिएको छ ।

०००