काठमाडौँ । राजस्व अनुसन्धान विभागले झण्डै एक क्विण्टल सुन बरामद प्रकरणमा अनुसन्धान जारी राखेको छ । उक्त प्रकरणमा जोडिएका एक जना एजेन्टसहित छ जनालाई पक्राउ परिसकेका छन् ।

उक्त सुन प्रकरणमा काठमाडौँको कालिकास्थानमा रहेको सिल्भर सिटी अपार्टमेण्टका मालिक दिपक मल्होत्राको नामसमेत जोडिएको छ ।

यसअघि विभिन्न अवैध घटनामा जोडिएका सामसङ मोबाइलको व्यापारीसमेत रहेका मल्होत्रा एक क्विण्टल सुन बरामद प्रकरणमा पनि मुछिएका छन् ।

सुन बरामदको घटनामा मुछिएपछि व्यापारी मल्होत्राले पत्रकार सम्मेलन गर्ने भएका छन् । उनले आज दिउँसो १ बजे दरबार मार्गस्थित रोयल सिंगे होटलमा पत्रकार सम्मेलन गर्न लागेका हुन् ।

सुन बरामद भएसँगै प्रहरीले बूढानीलकण्ठमा रहेको ‘रेडी ट्रेडर्स प्रा.लि.’का सञ्चालक दोलखाको मेलुङ गाउँपालिका ३ घर भई हाल काठमाडौँको साँखु बस्ने २१ वर्षीय दिलिप भुजेल, सोही ठेगाना घर भई स्वयम्भू बस्ने वर्ष ५३ का रामकुमार भुजेललाई पक्राउ गरेको छ ।

यस्तै, भन्सार एजेण्ट राजेन्द्र राई, हर्क राई र ट्याक्सी चालक अशोक लामा रहेका छन् । एक जनाको नाम खुल्न बाँकी रहेको प्रहरीले जनाएको छ ।