काठमाडौं । नेपाली कांग्रेसले नक्कली भुटानी शरणार्थी प्रकरणमा पूर्पक्षका लागि थुनामा परेका पूर्वगृहमन्त्री तथा पार्टी केन्द्रीय सदस्य बालकृष्ण खाणलाई केन्द्रीय सदस्यबाट निलम्बन गरेन । साउन २ गतेबाट बसेर बुधबार सम्पन्न भएको केन्द्रीय समिति बैठकले खाणबारे कुनै निर्णय लिएन ।

यघपी कांग्रेस बैठकले भ्रष्टाचार नियन्त्रण र सुशासनका लागि सरकारले थालेको कदममा साथ र समर्थन गर्ने निर्णय भने गरेको बैठकका निर्णय सुनाउने क्रममा महामन्त्री विश्वप्रकाश शर्माले बताए ।

आरोप लागेर पूपक्र्षका लागि थुनामा पुगेपछि उपसभापति तथा कानुन न्याय तथा संसदीय मामिलामन्त्री धनराज गुरुङ, महामन्त्रीद्वय शर्मा र गगन थापा तथा संस्थापन इतरका केन्द्रीय सदस्यहरू खाणलाई निलम्बन गर्नु पर्ने पक्षमा थिए । त्यही अनुसारको धारण केन्द्रीय समिति बैठकमा राखेका पनि थिए ।

तर, सभापति शेरबहादुर देउवासहित संस्थापन पक्षका पदाधिकारी र सदस्यहरू खाणको पक्षमा देखिएपछि कांग्रेस बैठक खाणबारे मौन रहेको हो । महामन्त्री थापाले भने खाणलाई कारबाही नगर्ने निर्णयमा लिखित रूपमा फरक मत दर्ज गरेका छन् ।

कांग्रेसले अख्तियार दुरुपयोग अनुसन्धान आयोगसम्बन्धी ऐन कांग्रेसकै सरकारले ल्याएको स्मरण गर्दै भ्रष्टाचार जघन्य अपराध भएको भन्दै उसले जो कोहीले भ्रष्टाचार गरे कानुन बमोजिम कारबाही हुनुपर्ने निर्णय गरेको छ ।

कांग्रेसको समर्थनमा बनेको वर्तमान सरकारले थालेको कदमलाई साथ र समर्थन गर्ने निर्णय पनि कांग्रेसले गरेको महामन्त्री शर्माले बताए ।