बर्दिबास। उपप्रधानमन्त्री एवम् गृहमन्त्री नारायणकाजी श्रेष्ठले मधेस प्रदेशका प्रमुख जिल्ला अधिकारीहरू, प्रशासनिक निकायका प्रतिनिधि तथा सुरक्षा निकायका प्रतिनिधिहरूसँग छलफल गरेका छन् । छलफलका क्रममा गृहमन्त्री श्रेष्ठले शान्तिसुरक्षा एवम् समसामयिक सेवा तथा वितरण चुस्त बनाउन निर्देशन दिए ।

श्रेष्ठले मिटरब्याज (अनुचित लेनदेन) पीडितलाई आवश्यक समन्वय गरेर न्याय दिन समेत निर्देशन दिए । मिटरब्याज (अनुचित लेनदेन) सम्बन्धी कानुन आज नै राष्ट्रियसभाबाट पारित भएको छ ।

‘एकातिर कानुन छ, एकातिर आयोग छ, एकातिर तपाईंहरू हुनुहुन्छ। सकेसम्म अहिले नै आवश्यक समन्वय गरेर पीडितलाई न्याय दिनेगरि मिटरब्याज सम्बन्धी काम गर्नुहोला,’ गृहमन्त्री श्रेष्ठले निर्देशन दिँदै भने ।

नेपाल–भारत सीमामा हुने सामान ओसारपसारमा राज्यलाई नोक्सान पुर्‍याउने वा अवैध ओसारपसार गर्ने कामलाई कडाईका साथ नियन्त्रण गर्न उनले निर्देशन दिए । जनताको दैनिक आवश्यकता र व्यापारीक उद्देश्य के हो त्यसलाई दुईपाटोबाट हेर्न उपप्रधानमन्त्री श्रेष्ठले निर्देशन दिए ।

‘दैनिक व्यवहारिक आवश्यकता टार्न सामान ल्याउने कुरामा लचक हुनुहोस् र व्यापारीक प्रयोजनमा ल्याएको भए कडाई गर्नुहोस्,’ उनले भने ।