काठमाडौँ । महिला विश्वकप फुटबलको फाइनलमा इङ्ल्याण्ड र स्पेन भिड्ने भएका छन् । सिड्नीमा बुधबार इङ्ल्याण्डले घरेलु टोली अष्ट्रेलियालाई ३–१ गोल अन्तरले पराजित गरेर स्पेनसँग भिडन्त पक्का गरेको हो ।

पहिलो पटक सेमिफाइनल पुगेको अष्ट्रेलियाको कमजोर डिफेन्सको फाइदा उठाउँदै इङ्ल्याण्डले प्रभावशाली जित निकाल्यो ।

खेलमा अग्रता इङ्ल्याण्डले ३६ औं मिनेटमा इला टोनीको गोलबाट लिएको थियो । दोस्रो हाफमा ६३ औं मिनेटमा घरेलु टोलीका लागि फरवार्ड साम केरले गोल गर्दै खेल बराबरीमा ल्याएकी थिइन् ।

त्यसपछि अष्ट्रेलियाको कमजोर डिफेन्डसको फाइदा उठाउँदै इङल्याण्डले दुई गोल थप्यो ।

डिफेन्समा क्लियर हुन नसकेको बलमा ७१ औं मिनेटमा लौरेन हेम्पले इङ्ल्याण्डलाई अघि बढाएकी थिईन् । खेल सकिन चार मिनेट अघि एलिसिया रुसोले अर्को गोल थप्दै इङ्ल्याण्डलाई फाइनलको यात्रा तय गराइन् ।

स्पेनले महिला विश्वकप फुटबल २०२३ को पहिलो सेमिफाइनलमा स्विडेनलाई २–१ ले स्तब्ध पारेको थियो । स्पेनले पहिलोपल्ट प्रतियोगिताको फाइनल खेल्ने भएको छ ।