काठमाडौं । सभामुख देवराज घिमिरेले आफुले अवरुद्ध सदन खुलाउन पटक पटक प्रयास गर्दा पनि सफल हुन नसकेको बताएका छन् । सभामुख घिमिरेले आइतबार संसदमा रहेका दलका प्रमुख सचेतकहरुसँग गरेको छलफल पनि बिना निश्कर्ष टुग्गिएपछि सभामुख घिमिरेको त्यस्तो प्रतिक्रिया आएको हो ।

संसद साउन मिहनाभरी एक दिन पनि चल्न सकेको छैन । प्रमुख प्रतिपक्षी दल नेकपा एमालेले सुन प्रकरण छानबिनका लागि उच्चस्तरीय न्यायिक छानबिन समिति गठन गर्नुपर्ने बताउँदै आएको छ ।

तर सरकारले सुन प्रकरणको छानबिनका लागि नेपाल प्रहरीको केन्द्रीय अनुसन्धान ब्यूरो (सीआईबी)लाई जिम्मा लगाएको छ । सीआईबीले यो प्रकरणको अहिले छानबिन गरिरहेको छ । तर सदनमा भने सत्ता र प्रमुख प्रतिपक्षका बीचमा अनुसनधान कसले गर्ने भन्ने जुहारी परेका कारण सदन खुल्न सकिरहेको छैन । सभामुख घिमिरेले प्रधानमन्त्रीलाइ समेत भेटेर सदन खुल्ने वातावरण निर्माणका लागि सहयोगी बनिदिन आग्रह गदैं आएका थिए ।

आइतबार पनि एमाले आफ्नै अडानमा छ । सरकार पनि छानबिन अहिले सीआइबीको हातबाट खोसेर अन्यत्र दिन चाहिरहेको छैन । जसकाकारण गतिरोध यथावत नै छ । त्यसपछि नै सभामुखले आफुले सदन खुलाउन गरेको प्रयास सफल हुन नसकेको बताएका हुन् ।

घिमिरेले निकासका विकल्प खोजिरहे पनि दलहरुबीच सहमति नबनेसम्म आफूले यसै गर्नुपर्छ भन्ने अवस्था नरहेको पनि उल्लेख गरे।

‘प्रधानमन्त्रीसँग नजिक रहेर निकास दिने कोसिस गरिरहेको छु’, उनले प्रमुख दलका सेचतकहरुसाग गरेको छलफलमा भने ‘सदनलाई यसरी लामो समय बन्धक राखिरहनु पर्दैन।’

सभामुख घिमिरेले सदनमा अवरोधबाट आफूहरुले प्रधानमन्त्रीदेखि राष्ट्रपतिसँग पनि छलफल गरिसकेको कुरा बैठकमा सुनाए।

घिमिरेले आजै प्रधानमन्त्रीको पहलमा बस्ने सर्वदलीय बैठकले निकास निकालेर सदन सदन अघि बढ्न सक्ने विश्वास लिए।

‘सभापतिहरुको चयन पनि अझै बाँकी रहेको छ’, उनले भने, ‘अब अहिलेको समस्याको निकास निकालेर अघि बढ्नु उचित हुन्छ।’