काठमाडौँ । नेपाली राष्ट्रिय फुटबल टोलीका फरवार्ड विमल घर्तीमगर विवाह बन्धनमा बाँधिएका छन्। पाँच वर्षदेखि प्रेमसम्बन्धमा रहेका विमल र उनकी प्रेमिका लिना प्रधान विवाह बन्धनमा बाँधिएका हुन्।

विमलले आइतबार सामाजिक सञ्जाल फेसबुकमा आफ्नी प्रेमिकासँगको विवाहको तस्बिर सार्वजनिक गर्दै लेखेका छन्, ‘मेरो हिजो आज र सँधैभरि । र उनी अरु कोही होइनन् मेरी अर्धाङ्गिनी।’

विमलले एएफसी कप छनोटको प्लेअफ अन्तर्गत दशरथ रंगशालामा भएको पारो एफसीविरुद्ध प्लेयर अफ द म्याच बनेपछि खेलमा गरेको गोल लिनालाई नै समर्पण गरेका थिए।

विमल हालसालै मात्र एफसी कप छनोट खेलेर भारतबाट फर्किएका हुन्। एन्फा एकेडेमीका उत्पादन उनी केही समय चोटग्रस्त रहेका थिए।

विमल माल्दिभ्समा फुटबल खेल्न जाँदा पहिलोपटक लिनासँग उनको भेट भएको थियो । लिना हाल युएईमा वैदेशिक रोजगारीमा छिन् । छुट्टीमा नेपाल आएकी लिना दुई तीन दिनमा युएई फर्कने तयारीमा छिन् ।