काठमाडौँ । राष्ट्रिय महिला क्रिकेट टोलीले चार देश सम्मिलित महिला टि २० आई खेलमा विजयी सुरुवात गरेको छ। अलराउण्डर सिता राना मगर र सम्झना खड्काको उत्कृष्ट प्रर्दशनमा नेपाली क्रिकेट टोलीले विजयी सुरुवात गरेको हो ।

हङकङले दिएको ८५ रनको लक्ष्य नेपालले १५.५ ओभरमा ४ विकेटको क्षतिमा भेट्टायो। लक्ष्य भेट्टाउने क्रममा सम्झना कुमारी खड्का ३६ सीता राना मगर ३ रनमा नटआउट रहे। सम्झना ३६ बलमा ५ चौका हान्दै ३६ रनको योगदान दिइन्।

ओपनर पुजा महतोले १६ रनको योगदान दिइन्। नेपाली राष्ट्रिय महिला टोलीमा डेब्यु गरेकी पुजाले एक विकेट पनि लिएकी थिइन् ।

ओपनर बिन्दु रावल शुन्यमा एलबीडब्लु धरापमा परिन्। इन्दु बर्मा ९ रन बनाउँदा
रुविना क्षत्री वेलबासेले १० रन बनाइन् ।

त्यसअघि वायोमास ओलल क्रिकेट मैदानमा नेपालले टस जितेर फिल्डिङ रोजेपछि ब्याटिङ गरेको हङकङ १९.१ ओभरमा ८४ रन बनाउँदा अलआउट भएको थियो ।

हङकङकी यास्मिन दासवानी ६, मारिको तविथा ओटा ६, सिंगयान डोरोथिया चान १६, शान्जिन शहजादलाई २, रुचिथा भेन्काटेस १ र बिबि मर्यामलाई ९ तथा
का यिङ चान ३४ रन बनाएर आउट भए ।

नेपालका लागि सीता राना मगरले ५ विकेट लिइन्। इन्दु बर्माले दुई, रुविना क्षत्री, पुजा महतो र कविता कुवँरले एक, एक विकेट लिए।

सिरिजको दोस्रो खेलमा नेपालले भोलि बुधबार कुवेतसँग खेल्नेछ।