काठमाडौं । अन्तर्राष्ट्रिय क्रिकेट काउन्सिल आईसीसीले एसिया कप प्रतियोगिता सुरु हुनु अघि हेर्न लायक ६ खेलाडीको सूची तयार पारेको छ । यसिया कप खेल्ने ६ राष्ट्रबाट एक,एक जना खेलाडी समेटिएको सूचीमा नेपालबाट फास्ट बलिङ अलराउण्डर गुल्सन झा परेका छन् ।

बुधबार (भोलि)देखि सुरुमा हुने एसिया कपको उद्घाटन खेल पाकिस्तानको मुल्तान क्रिकेट स्टेडियममा नेपालले घरेलु टोली पाकिस्तानसँग खेल्दैछ । यही खेलबाट नेपालले एसिया कपमा डेब्यु गर्दैछ ।

प्रतियोगिता सुरु हुनुअघि सार्वजनिक हेर्न लायक ६ खेलाडीको सूचीमा नेपालबाट झा परेका हुन् । सूचीमा पाकिस्तानबाट कप्तान बाबर आजम, भारतबाट फास्ट बलर जसप्रित बुमराह, अफगानिस्तानबाट कप्तान रासिद खान परेका छन् । श्रीलंकाबाट बलर महिश थिक्सना र बंगलादेशबाट पनि बलर तस्किन अहमेद हेर्न लायक खेलाडीको सूचीमा परेका छन् ।

नेपालका गुल्सन ओडीआईको अलराउण्डर वरीयतामा १०५औं स्थानमा छन् ।

१७ वर्षीय गुल्सनले आईसीसी क्रिकेट विश्वकप क्वालिफायरमा ब्याट र बल दुवैमा उत्कृष्ट प्रदर्शन गरेका थिए ।

हेर्न लायक खेलाडीको सूचीमा परेका पाकिस्तानका कप्तान आजम ओडीआई वरीयताको नम्बर वान ब्याटर हुन् । २८ वर्षीय बाबर अहिले उत्कृष्ट लयमा छन् ।

भारतका बुमराह ओडीआई बलरको ३२औं वरीयतामा छन् ।

ओडीआईमा विश्व नम्बर चार वरीयतामा रहेका रासिद खान विश्वमै उत्कृष्ट स्पीनरको रुपमा छन् ।

ओडीआई बलरमा २०औं वरीयतामा रहेका श्रीलंकन थिक्सनाले विश्वकप छनोटमा २१ विकेट लिएका थिए ।

बंगलादेशी फास्ट बलर तस्किन अहमद ओडीआई वरीयतामा ४४औं स्थानमा छन् ।