काठमाडौँ । एसिया कप क्रिकेट प्रतियोगितामा बंगलादेशले अफगानिस्तानलाई ३ सय ३५ रनको लक्ष्य दिएको छ ।

लाहोरको गद्दाफी स्टेडियममा टस जितेर ब्याटिङ गरेको बंगलादेशले निर्धारित ५० ओभरमा ५ विकेट गुमाएर ३ सय ३४ रन बनायो । बंगलादेशका लागि मेहदी हसन मिराज र नजमुल होसेन शान्तोले शतक बनाए । मिराज १ सय १२ रनमा रिटायर्ड हर्ट भए । शान्तो १ सय ४ रनमा आउट भए ।

कप्तान शाकिब अल हसनले ३२ रन बनाए । बलिङतर्फ अफगानिस्तानका मुजिब उर रहमान र गुलबदिन नइबले १, १ विकेट लिए ।

प्रतियोगिताको ‘सुपर फोर’ मा पुग्न बंगलादेशलाई यो खेल जित्नैपर्ने दबाब छ । पहिलो खेलमा बंगलादेश श्रीलंकासँग पराजित भएको थियो भने प्रतियोगितामा पहिलो खेल खेलिरहेको अफगानिस्तान भने जित निकाल्दै एक खेलअघि नै ‘सुपर फोर’ मा स्थान पक्का गर्न चाहन्छ । समूह ‘बी’ मा श्रीलंक एक खेलमा दुई अंकसहित शीर्ष स्थानमा छ ।

यस्तै समूह ‘ए’ बाट पाकिस्तान दुई खेलमा तीन अंकसहित ‘सुपर फोर’ मा पुगिसकेको छ । भोलि सोमबार हुने भारत र नेपालबीचको खेलले यो समूहबाट सुपर ‘फोर’ मा पुग्ने अर्को टोलीको टुङ्गो लाग्नेछ । भारतले पहिलो खेलमा पाकिस्तानसँग १,१ अंक बाड्यो । नेपाल भने पहिलो खेलमा पाकिस्तानसँग पराजित भएको थियो ।