काठमाडौँ । एसिया कप क्रिकेट प्रतियोगिताको समूह चरणको खेलमा नेपालले भारतलाई २३१ रनको लक्ष्य दिएको छ ।

पहिलो पटक एसिया कप र भारतसँग खेलेको नेपालले ४८ ओभर २ बलमा सबै विकेट गुमाउँदै २३० रन बनायो ।

नेपालका लागि ओपनर आसिफ शेखले अर्धशतक बनाए । उनले ९७ बलमा ८ चौकासहित ५८ रन बनाए । त्यस्तै सोमपाल कामीले ५६ बलमा एक चौका र दुई छक्काको मद्दतमा ४८ रन बनाए ।

ओपनर कुशल भुर्तेलले २५ बलमा दुई छक्का र तीन चौकाको मद्दतमा २५ बलमै ३८ रन जोडे । दिपेन्द्र सिंह ऐरी २९ र गुल्सन झा २३ रन बनाएर आउट भए ।

सन्दीप लामिछाने ९, भीम सार्की ७, कप्तान रोहितकुमार पौडेल ५ र कुशल मल्ल दुई रनमै आउट भए भने करण केसी २ रनमा अविजित रहे ।

भारतका मोहम्मद सिराज र रवीन्द्र जडेजाले ३/३ विकेट लिए । मोहम्मद सामी, हार्दिक पान्ड्या र सार्दुल ठाकुरले एकएक विकेट हात पारे ।