काठमाडौं । देशकै प्रमुख बाल अस्पतालका रुपमा रहेको कान्ति बाल अस्पतालको इमर्जेन्सीमै उपचार नपाएर एक बालिकाको मृत्यु भएको छ ।
मकवानपुर थाहा नगरपालिका-१० घर भई हाल काठमाडौं बाफलमा बस्दैं आएकी पाँच वर्षीया रेजिशा गोपालीको मृत्यु भएको हो ।

अस्पतालको बहिरंग सेवा दिनमा तीन घन्टा मात्रै खुल्दा इमर्जेन्सीमा विरामीहरुको भीड बढेकोले विरामीहरुले उपचार समयमै नपाउादा ती बालिकाको मृत्यु भएको हो । सामान्यता अस्पताल लगिएका विरामी उपचार नपाएर मदैनन भन्ने नेपाली उखान छ । तर ती बालिकाले भने उपचारको पालो कुर्दैमा दुई घण्टा विताउादा समेत पालो नपाएपछि जीवन गुमाउन परेकी थिइन् ।

उच्च ज्वरोले थलिएकी रेजिशालाई सोमबार अपरान्ह ५ बजे उनका आमा र हजुरबुवाले कान्तिको इमर्जेन्सीमा पुर्‍याएका थिए । तर, १ बजेदेखि नै ओपीडी सेवा टिकट बन्दका कारण सबै बिरामी इमर्जेन्सीमै ओइरिएका थिए ।

त्यही कारण इमर्जेन्सी लाइनमा पुगेकी सिकिस्त बिरामी रेजिशाले समयमा इमर्जेन्सीमा उपचार पाउनुको साटो लाइनमा पालो कुर्दाकुदै ज्यान गुमाएकी हुन् ।

अस्पतालका निर्देशक डा. पंकज रायले उपचारमा ढिलाइ भएकै कारण बालिकाले ज्यान गुमाएको स्वीकार गरेका छन् । ‘इमर्जेन्सीको लाइनमा जस्तो बिरामी पनि बस्नुपर्ने अवस्था छ । कोही सामान्य र कोही साँच्चै इमर्जेन्सी नै हुन्छन् । छुट्याउन गाह्रो अवस्था छ । त्यही भएर ती बालिकाको मृत्यु पालो कुर्दा हुन पुग्यो’ रायले भने, ‘अब इमर्जेन्सीमा आएर गाह्रो भएका बिरामीले पालो कुर्नुपर्दैन, हामीले मंगलबारदेखि नै नियम सुधारेका छौँ ।’