विराटनगर । सर्वोच्च अदालतको परमादेश बमोजिम कोशी प्रदेशमा आज नेकपा एमालेका संसदीय दलका नेता हिक्मत कार्की मुख्यमन्त्री बन्दैछन् ।

सर्वोच्च अदातलको न्यायाधीशहरू सपना प्रधान मल्ल, डा. कुमार चुँडाल र नहकुल सुवेदी संम्मिलित पूर्ण इजलासले बिहीबार प्रदेश सभाको सबैभन्दा ठूलो दलको नेता हिक्मत कार्कीलाई ४८ घण्टाभित्र मुख्यमन्त्री नियुक्त गर्न परमादेश जारी गरेको थियो ।

त्यही परमादेश अनुसार प्रदेश प्रमुखको कार्यालयले आजै कार्कीलाई मुख्यमन्त्रीमा नियुक्र गरी शपथ ग्रहण गराउने तयारी गरेको हो ।

मुख्यमन्त्री कार्कीले शपथ ग्रहणसँगै २ जना मन्त्री नियुक्त गर्ने तयारी गरेका छन् । निकटस्थ स्रोतले तीलकुमार मेन्याङ्वो र एकराज कार्कीलाई मन्त्री बनाउने तयारी कार्कीले गरेका बतायो ।

सर्वोच्चले बिहीबार कोशी प्रदेशका मुख्यमन्त्री उद्धव थापाले लिएको विश्वासको मत असंवैधानिक ठहर गर्दै पदमुक्त गरेको थियो ।

इजलासले संविधानको धारा १६८ को उपधारा ३ बमोजिम कार्कीलाई ४८ घण्टाभित्र कोशी प्रदेशको मुख्यमन्त्री नियुक्त गर्न आदेश दिएको थियो ।