हेटौंडा । नेकपा एमाले बागमती प्रदेश अधिवेशनको मिति नजिकिँदै जाँदा नेतृत्वका आकाक्षीहरु खुल्न थालेका छन् । अहिलेसम्म नेतृत्वका बारेमा ठ्याक्कै अड्कलवाजी लगाउन नसकिएपनि आधा दर्जन बढीले नेतृत्व हत्याउन भित्री तयारी शुरु गरेका छन् ।

बागमती प्रदेशमा एमालेको प्रदेश अधिवेशन असोज ८-९ गते हुँदैछ । अधिवेशनले २ सय ४० जनाको कमिटीमात्रै चयन गर्दैछ । अधिवेशनले अध्यक्ष, उपाध्यक्ष, सचिव र दुई उपसचिव गरी ५ पदाधिकारीसहित नयाँ कमिटी बनाउनेछ । हाल ४ सय ७७ जना रहेको बागमती प्रदेश कमिटीमा सर्वसम्मात नभए लुम्बिनीकै बाटोमा पुगेर मतदानबाट नयाँ नेतृत्व चयन हुनेछ ।

अहिलेसम्म अध्यक्षका लागि ८ जना नेताहरुको चर्चा छ । हालसम्म अध्यक्षको लागि केन्द्रीय सदस्यहरू कृष्णप्रसाद दाहाल, कैलाश ढुंगेल, पूर्वपोलिटब्युरो सदस्य एवम बागमती प्रदेशका पुर्वसभामुख सानुकुमार श्रेष्ठ, हालका प्रदेश अध्यक्ष केशवराज पाण्डे, सचिव विजय सुवेदी मुख्य दाबेदार देखिएका छन् । चितवनका नेता कृष्णभक्त पोखरेल, धादिङका भूमि त्रिपाठी र खेम लोहनीको नाम पनि चर्चामा छ ।

जनप्रतिनिधिको मापदण्ड नभएको थियो भने प्रदेश अध्यक्षका लागि सर्वाधिक प्रभावशाली नेता गोकुल बास्कोटाको नाम अग्रपंक्तिमा थियो । प्रदेशमा पार्टीलाई बलियो बनाउन गोकुलजस्ता नेताको आवश्यकता रहे पनि मापदण्ड बाधक बनेको यहाँका नेताहरु बताउँछन् ।

त्यसो त नेतृत्वले माथिल्लो तहबाटै अध्यक्ष बनाउन चाहेमा स्थायी कमिटी सदस्य शेरवहादुर तामाङदेखि पोलिटव्युरो सदस्यहरु आनन्द पोखरेल,पार्वत गुरुङ,महेश बस्नेतलगायत पनि पछि हट्ने अवस्था थिएन । तर निर्वाचन नै हुने अवस्थामा उनीहरु तल जाने अवस्था छैन । जसकाकारण अन्य ८ जना नेताहरु आफुलाई नेताहरुको विश्वास जितेर नेतृत्व हत्याउन लागिपरेका छन् । अन्तिम समयसम्म कति नेता प्रतिस्पर्धामा आउँछन् भन्नेमा अहिले नै भन्न् नसकिने अवस्था रहेको एमाले नेताहरु बताउँछन् ।

प्रदेश अध्यक्ष कार्यकारी भूमिकामा रहने र पोलिटब्युरो सरहको हैसियत हुने भएको कारण पनि उक्त पद हत्याउन केन्द्रीय सदस्य पनि दाबेदार देखिन्छन् ।

आकांक्षीमध्ये केन्द्रीय सदस्य रामेछापाका कैलाश ढुंगेल, मकवानपुरका कृष्णप्रसाद दाहाल र हालका अध्यक्ष नुवाकोटका केशवराज पाण्डे अलिक बढी चर्चामा छन् ।