विराटनगर । सरकारको घनचक्कर लगाईरहेको कोशी प्रदेशमा आज मन्त्रिपरिषद् विस्तार हुन लागेको छ । मुख्यमन्त्री हिक्मत कार्कीले आज आफ्नै पार्टी एमालेका चार नेतालाई थपेर मन्त्रिपरिषद् विस्तार गर्न लागेका हुन् ।

कार्की संविधानको धारा १६८ (३) अनुसार प्रदेश सभाको सबैभन्दा ठूलो दलको हैसियतमा मुख्यमन्त्री नियुक्त भएका छन् । उनले आगामी असोज २० अर्थात अबको १२ दिनभित्र प्रदेश सभामा विश्वासको मत लिनुपर्ने हुन्छ ।

उनले विश्वासको मत प्राप्त गर्न नसकेमा प्रदेश सभाका जुन सांसदले विश्वासको मत लिनसक्ने विश्वाससहित मुख्यमन्त्री दावी गर्छन्, उनैलाई प्रदेश सभाका अध्यक्षले मुख्यमन्त्री नियुक्त गर्नुपर्ने हुन्छ ।

कार्की यस अगाडी पनि संविधानको धारा १६८ (२) अनुसार प्रदेश सभाको मुख्यमन्त्री नियुक्त भएका थिए । तर उनले विश्वासको मत पाउन नसकेपछि स्वत पदमुक्त भएका थिए । त्यसपछि कांग्रेस दलका नेता उद्दव थापा दुई पटक मुख्यमन्त्री बने । तर उनलाई सर्वाेच्च् अदालतले अवैध ठहर गरेपछि फेरि घुमेर कार्कीनै मुख्यमन्त्री बनेका हुन् ।

उनलाई अदालतले मुख्यमन्त्री बनाउन परमादेश दिएको थियो ।

प्रदेश सभामा उनको दल एमालेलाई राप्रपाको पनि साथ छ । तर विश्वासको मत लिन आवश्यक एउटा संख्या अझै उनीसँग छैन । उनले विश्वासको मतको बाताबरण निर्माणका लागि सरकार विस्तार गरेका थिएनन । तर आज उनले पार्टीका नेताहरुलाई सरकारमा सहभागी गराउन लागेका हुन् ।

मुख्यमन्त्री बनेपछि उनी काठमाडौं मा राजनीतिक भेटघाटका लागि पुगेका थिए । तर काठमाडौंबाट आजै विराटनगर फर्केपछि उनले आज मन्त्रिपरिषद् विस्तार गर्न लागेका हुन् ।

उनले लीलाबल्लव अधिकारी, निरन राई, वुद्धिकुमार राज भण्डारी र रामप्रसाद मेहतालाई मन्त्री बनाउँदैछन् ।

थपिने सबै मन्त्री एमालेकै हुन् । यसअघि एमालेबाटै तीलकुमार मेन्याङ्बो, पिके राई, एकराज कार्की, सिर्जना राई मन्त्री भइसकेका छन् ।