विराटनगर । कोशी प्रदेशका मुख्यमन्त्री हिक्मत कार्कीले सोमबार मन्त्रिपरिषद विस्तार र मन्त्रीहरूको जिम्मेवारी हेरफेर गरेका छन्।

मुख्यमन्त्री कार्कीले दुई मन्त्री र दुई राज्यमन्त्री थपेका छन् । योसँगै मन्त्रिपरिषद् नौ सदस्यीय भएको छ ।

मन्त्रिपरिषद्मा अब तीन राज्यमन्त्री र मुख्यमन्त्रीसहित ६ मन्त्री भएका छन् ।

यसअघि खानेपानीमन्त्री रहेका तिलकुमार मेन्याङ्बो स्वास्थ्यमन्त्री बनेका छन् । पाँच कर्ण राई पर्यटन, वन तथा वातावरणमन्त्री बनेका छन् ।

एकराज कार्कीे भौतिक पूर्वाधार, लीलाबल्लभ अधिकारी आन्तरिक मामिला तथा कानुन मन्त्री, बुद्धिकुमार भण्डारी खानेपानी, सिँचाइ ऊर्जा मन्त्रीमा नियुक्त भएका छन्। अधिकारी र राजभण्डारी नयाँ मन्त्री नियुक्त भएका हुन् ।

रामप्रसाद महतो उद्योग कृषि सहकारी राज्यमन्त्री, सिर्जना राई सामाजिक विकास राज्यमन्त्री र निरन राई आर्थिक मामिला तथा योजना राज्यमन्त्रीमा बनेका छन् । उनीहरूको प्रदेश प्रमुख कार्यालयमा शपथ भएको छ।

सर्वोच्च अदालतको परमादेशपछि भदौ २२ मा संविधानको धारा १६८ को उपधारा ३ अनुसार मुख्यमन्त्रीमा नियुक्त एमाले संसदीय दलका नेता कार्कीले असोज २० भित्र विश्वासको मत लिइसक्नुपर्ने संवैधानिक बाध्यता छ।

अन्य कुनै दलले समर्थन नदिएकाले उनले विश्वासको मत पाउने सम्भावना न्यून छ ।

कांग्रेस, माओवादी, एकीकृत समाजवादी र जसपासहितको गठबन्धनले वर्तमान सरकारलाई साथ नदिने बताइसकेको छ । केन्द्रमा प्रतिपक्षमा रहेको र प्रदेशमा पनि एमालेसँगै रहेको राप्रपा पनि सरकारमा सहभागी भएको छैन । यसले कार्की नेतृत्वको सरकारले विश्वासको मत पाउने सम्भावना कम देखिएको छ ।

९३ सदस्यीय प्रदेश सभामा विश्वासको मत पाउन ४७ मत आवश्यक छ । एमालेसँग ४० मत मात्रै छ ।