झापा । दमकमा छुरा प्रहार गरेर इलाम चुलाचुली–३ का ३८ वर्षीय गोविन्द लिम्बूको हत्या भएको छ । लिम्बूलाई शुक्रबार बिहान दमक नगरपालिका–१ स्थित कुमाल चोकमा छुरा प्रहार भएको हो ।

प्रारम्भीक अनुसन्धानबाट दमक– ७ का २५ वर्षीय सनम राईले उनीमाथि छुरी प्रहार गरेको देखिएको जिल्ला प्रहरी कार्यालय झापाका प्रवक्ता डिएसपी खगेन्द्रप्रसाद रिजालले जानकारी दिए ।

छुरा प्रहारबाट लिम्बूको घाँटी, पाखुरामा गम्भीर चोट लागेका लिम्बूलाई उपचारका लागि लाइफलाइन अस्पताल पु¥याउने बित्तिकै डक्टरहरूले मृत घोषणा गरेका थिए ।

प्रहरीले मृतक लिम्बूसहित केही व्यक्तिहरू एक होटलमा बसेर मादक पदार्थ सेवन गर्दैगर्दा पिसाब फेर्ने निहुमा झगडा हुँदा लिम्बूमाथि छुरा प्रहार भएको हो ।

सँगै बसेका केहीलाई इलाका प्रहरी कार्यालय दमकले नियन्त्रणमा लिएर सोधपुछ गरिरहेको र सनमसहित केही व्यक्ति फरार रहेको प्रहरीले जनाएको छ ।