काठमाडौँ । आइसीसी विश्वकप क्रिकेटमा इंग्ल्याण्डले पहिलो जित निकालेको छ । भारतमा जारी प्रतियोगितामा आफ्नो दोस्रो खेलमा इंग्ल्याण्डले बंगलादेशमाथि १३७ रनको जित निकालेको हो ।

उद्घाटन खेलमा न्युजिल्याण्डसँग पराजित भएको इंग्ल्याण्डले दोस्रो खेलमा बंगालादेशलाई हराएको हो । पहिलो खेलमा जित निकालेको बंगलादेशको पहिलो हार हो । बंगलादेशले पहिलो खेलमा अफगानिस्तानलाई पराजित गरेको थियो ।

इंग्ल्याण्डले दिएको ३६५ रनको लक्ष्य पच्छ्याएको बंगलादेशले ४८‍.२ ओभर अलआउट हुँदै २२७ रनमात्रै बनाउन सक्यो ।

बंगलादेशका लागि लिटन दासले सर्वाधिक ७६ रन जोड्दा मुस्फिकुर रहिमले ५१ रनको अर्धशतकीय पारि खेले । इंग्ल्याण्डका रेस टोप्लेले सर्वाधिक ४ विकेट लिए ।

हिमांचल प्रदेशको धर्मशाला क्रिकेट स्टेडियमा भएको खेलमा टस हारेर पहिला ब्याटिङ गरेको इंग्ल्याण्डले निर्धारित ५० ओभरमा ९ विकेट गुमाउँदै ३६४ रन बनाएको थियो ।

इंग्ल्याण्डका लागि डेबिड मलानले १४० रन बनाए । उनले १०७ बलमा १६ चौका र ५ छक्का प्रहार गरे । जोय रुटले ८२, जोनी बेरिष्टोले ५२ रनको योगदान गरे ।

कप्तान जोस बटलर र ह्यारी ब्रुकले समान २० रनको योगदान गर्दा क्रिस वक्सले १४ रन बनाए ।

बंगलादेशका लागि मेहन्दी हशनले सर्वाधिक चार विकेट लिँदा शोरिफुल इस्लामले तीन तथा तास्किन अहमद र सकिब अल हसनले एक एक विकेट लिए ।