काठमाडौं । विश्वकप क्रिकेट २०२३ मा श्रीलंकाले पहिलो जित निकालेको छ । सदीरा समिराविक्रमाको अविजित ९१ रनको मद्दतमा श्रीलंकाले नेदरल्याण्ड्समाथि ५ विकेटको जित निकालेको हो ।

भारतको खनउनमा भएको खेलमा नेदरल्याण्ड्सले दिएको २६३ रनको लक्ष्य पछ्याएको श्रीलंकाको सुरुवाति प्रदर्शन खराब रह्यो । ५६ रन जोड्दा २ विकेट गुमाएको श्रीलंकाका पथुम निसांका पनि तेस्रो विकेटका लागि ५४ रनमा आउट भए । यसबेला टिमको स्कोर १०४ थियो । त्यसपछि क्रिजमा आएका सदीराले पारी सम्हाले ।

सदीराले चौथो विकेटका लागि चरिथा असलंकासँग ७७ र पाँचौं विकेटका लागि धनन्जय डि सिल्भासँग ७६ रनको साझेदारी गरे । उनी ९१ रनमा अविजित रहे । त्यस्तै दुशान हेमन्था ४ रनमा नटआउट रहे ।

टस जितेर पहिले ब्याटिङ गरेको नेदरल्याण्ड्सले ४९.४ ओभरमा सबै विकेट गुमाएर २६२ रन बनाएको थियो । नेदरल्याण्ड्सका लागि एंगलब्रेक्टले ७० र भान बेकले ५९ रन बनाए ।