मुगु । एकैपरिवारका चार जनाको मृत्यु प्रकरणबारे छानबिन गर्न प्रहरीको टोली मुगुको छायॉनाथ रारा नगरपालिका वडा नम्बर-६ मन्दु गाउँको घटनास्थलमा पुगेको छ । दसैंको टीका थाप्न सोही वडामा रहेको माइती गाउँ कोटिल्ला गएर ८ गते बेलुका घर फर्केका हरुको शव शुक्रबार घरमै भेटिएको थियो । घटनामा २६ वर्षीया आमा श्रीदेवी बोहोरा र उनका ११ वर्षीय छोरा मनोज बोहोरा ८ महिनाका छोरा रहर बोहोरा र ७ वर्षीया छोरी अप्सरा बोहोराको शव भेटिएपछि प्रहरी घटनास्थलमा पुगेको हो ।

सामूहिक हत्या प्रकरणका मुख्य दोषी र घटनाबारे अनुसन्धान गर्न कर्णाली प्रदेश प्रहरीको विशेष टोली घटनास्थलमा पुगेको हो । कर्णाली प्रदेश प्रहरी कार्यालयका प्रमुख डीआईजी भीम ढकालका अनुसार घटनाको अनुसन्धानका लागि जुम्लाबाट एक र सुर्खेतबाट २ टोली मुगु खटिएका छन् । जसमध्ये एउटा टोली घटनास्थलमै पुगिसकेको र अरु दुई टोली दिउँसोसम्म पुग्ने छ ।

उनका अनुसार सुर्खेतबाट अनुसन्धानका लागि वरिष्ठ सई नारायण शर्माको नेतृत्वमा पाँच सदस्यीय प्रहरी टोली र अर्को कुकुरसहितको अनुसन्धान टोली खटिएका छन् । एउटा टोली शुक्रबार राति कालिकोट बसेर शनिबार बिहानै मुगु पुगेको छ । टोलीले घटनाबारे विशेष अनुसन्धान थाल्ने डीआईजी ढकालले बताए ।

शुक्रबार बिहान ९ बजे घटनाको खबर पाउनासाथ घटनास्थलमा विस्तृत विवरण बुझ्न जिल्ला प्रहरी कार्यालय मुगुका प्रमुख प्रहरी नायब उपरक्षक वीरेन्द्र थापाको नेतृत्वमा प्रहरी घटनास्थलमा पुगेको थियो ।

शुक्रबारदेखि दिनभरिजसो प्रहरीले गाउँलेहरूबाट प्रारम्भिक सूचना लिने काम गरेको छ भने घटनास्थललाई सिल गरी पहरा दिइरहेको छ ।