काठमाडौँ । संयुक्त राष्ट्रसंघका महासचिव एन्टोनियो गुटेरेसले हमासको आक्रमणपछि इजरायलमा हराइरहेका नेपालका विपिन जोशीको सुरक्षित घर फिर्तीको कामना गरेका छन् । नेपालको चार दिने भ्रमणमा आएका महासचिव गुटेरेसले सबै बन्धकहरू विनासर्त रिहाई हुनुपर्ने बताए ।

आइतबार काठमाडौंमा आयोजित पत्रकार सम्मेलनमा महासचिव गुटेरेसले हमासले गरेको आक्रमणको भत्सर्ना गर्दै निहत्था नागरिकहरुमाथिको आक्रमण कुनै पनि अवस्थामा न्ययोचित नहुने बताए ।

‘अहिलेका समयहरु धेरै जटिल र तनावपूर्ण छन् । धेरै माइल टाढाको मध्यपूर्वमामा भएको द्वन्द्वले नेपालका जनताहरुलाई पनि नजिकबाट प्रभावित पारेको छ,’ महासचिव गुटेरेसले भने, ‘हमासले गरेको आंतकपूर्ण आक्रमणबाट १० जना नेपाली विद्यार्थीहरु मारिएको घटनाप्रति उनीहरुका परिवारजनमा मेरो गहिरो समवेदना छ र हराईरहेका विपिन जोशी सुरक्षित रुपमा फर्किन्छन् भन्ने कामना गर्दछु ।’

कतार हुँदै नेपाल आएका उनले गाजा क्षेत्रको आक्रमण केही घण्टादेखि झन् भयावह बन्दै गइरहेको बताए । उनले उक्त कार्यप्रति खेद प्रकट गरे ।

‘मानवीय सहायताका लागि पनि विश्राम जरुरी छ तर इजरायलले आक्रमण गरिरहेको छ यसप्रति म खेद प्रकट गर्दछु,’ गुटेरेसले भने ।

सबै पक्षहरूले अन्तर्राष्ट्रिय मानवीय कानून अन्तर्गत आफ्ना दायित्वहरूको सम्मान गर्नुपर्ने उनको भनाइ थियो ।