काठमाडौं । इन्टरनेट सेवा प्रदायक संस्था एनटीसी, एनसेल, भायानेट, वल्र्डलिंक र सुबिसुले टिकटक एप प्रयोगमा प्रतिबन्द लगाएका छन् । अर्थात अब एनटीसी, एनसेल, भायानेट, वल्र्डलिंक र सुबिसुमा टिकटक एप नचल्ने भएको छ ।

सरकारले सोमबारमात्रै टिकटक प्रयोगमा प्रतिबन्ध लगाउने निर्णय गरेको थियो । मन्त्रिपरिषद्को बैठकले निर्णय गरेलगत्तै सञ्चार तथा सूचनाप्रविधि मन्त्रालयले नेपाल दूरसञ्चार प्राधिकरणलाई पत्र लेखेर सरकारको निर्णय कार्यान्वयन गर्न निर्देशन दिएको थियो ।

प्राधिकरणले इन्टरनेट सेवा प्रदायकलाई पत्राचार गरेर टिकटक बन्द गर्न भनेको थियो । त्यही निर्देशन बमोजिम यी संस्थाले टिकटक एप नचल्ने बनाएका हुन् ।

तर, टिकटक प्रयोगमा प्रतिबन्ध लगाउने सरकारको निर्णय अझै पूर्णरूपमा कार्यान्वयनमा आउन सकेको छैन । यी बाहेकबाट नइन्टरनेट चलाउने प्रयोगकर्ताले टिकटक चलाइरहेका छन् ।

नेपाल दूरसञ्चार प्राधिकरणका अध्यक्ष पुरुषोत्तम खनाल भने आजै टिकटक पूर्णरूपमा बन्द भइसक्ने जानकारी दिए ।