काठमाडौँ । ग्लोबल नेप्लिज कराते अर्गनाइजेसनले १०औँ विश्व सितोरियो कराते च्याम्पियनसिपका पदक विजेता खेलाडीलाई आज नगदसहित सम्मान गरेको छ । इन्डोनेसियाको जकार्तामा गत सेप्टेम्बर २२ देखि २४ तारिखसम्म भएको उक्त प्रतियोगितामा नेपालले एक स्वर्ण, तीन रजत र छ काँस्यपदक जितेको थियो ।

नेपालका लागि एरिका गुरुङले एक मात्र स्वर्ण दिलाएकी थिइन् । कार्यक्रममा १९औँ एसियाली खेलकुदकी ऐतिहासिक रजत विजेतासमेत रहेकी एरिकालाई ३० हजार नगदसहित प्रशंसा पत्र प्रदान गरियो ।

त्यस्तै रजत विजेता विप्लवलाल श्रेष्ठ, निरुपमा दोङ तामाङ र मोहम्मद शेखु अलामले १५ हजार नगदसहित प्रशंसा पत्र पाए ।

कास्य पदक जितेका सन्तोष श्रेष्ठ, सविना श्रेष्ठ, आशिष थापा, पुष्पका लामा, एलिशा राजकोटी मगर र सानुमाया थिङले जनही रु १० हजारसहति प्रशंसापत्र प्रदान गरियो । नेपाल ओलम्पिक कमिटीका अध्यक्ष जीवनराम श्रेष्ठ, बागमती प्रदेशसभा सदस्य मीनकृष्ण महर्जन, अर्गनाइजेसनका अध्यक्ष एवं आठौंँ दक्षिण एसियाली खेलकुदका स्वर्ण विजेता सुरेन्द्रलाल श्रेष्ठ, अर्गनाइजेसनका प्रमुख सल्लाहकार एवं करातेका संस्थापक थानेश्वर राई र नेपाल कराते महासङ्घका अध्यक्ष युवराज लामाले नगद, प्रशंसापत्र, खेल सामग्री र सहयोग रकम हस्तान्तरण गरेका थिए ।
सोही अवसरमा एसियाली खेलकुदका प्रशिक्षकद्वय कुशल श्रेष्ठ, छोरी मैया डङ्गोल र वीरकृष्ण शाही तथा टिम व्यवस्थापक निवासगोपाल वैद्यलाई पनि प्रशंसापत्रबाट सम्मान गरिएको थियो ।