सर्लाही । सर्लाहीमा बसको ठक्करबाट एक युवकको मृत्यु भएको छ।

शनिबार साँझ पूर्वपश्चिम राजमार्गमा पर्ने बागमती नगरपालिका ४ पुरानो चौकीमा दुई मोटरसाइकल एक आपसमा ठक्कर खाँदा उछिट्टिएर सडकमा खसेका युवकलाई बसले किचेपछि मृत्यु भएको हो।

तीव्र गतिमा रहेको प्र२ ०३ ००६ प ६७ मोटरसाइकल र बा २ ब ५७६६ नम्बरको मोटरसाइकल आपसमा जुध्दा प्र२ ०३ ००६ प ६७ नम्बरको मोटरसाइकलमा सवार युवक सडकमा खसेका थिए। त्यहीबेला मलंगवाबाट काठमाडौँतर्फ जाँदै गरेको ना७ ख १८३६ नम्बरको बसले किच्दा युवकको घटनास्थलमै मृत्यु भएको सर्लाहीका डीएसपी दीपेन्द्र पञ्जियारले जानकारी दिए।

प्रहरीका अनुसार मृतक युवकको अझै सनाखत भएको छैन । उनको शव पोस्टमार्टमको लागि प्रादेशिक अस्पताल मलंगवामा राखिएको छ।

दुर्घटनापछि बसका चालकलाई प्रहरीले नियन्त्रणमा लिएको छ।

दुर्घटनामा परेको मोटरसाइकलका चालक भागेको कारण मृतक युवकको सनाखतमा समस्या परेको डीएसपी पञ्जियारले बताए।