उदयपुर । त्रियुगा नगरपालिका–४ बगाहा क्षेत्रमा बसोबास गर्दै आएका मगर समुदायले परम्परागत हुर्रा नाच संरक्षण गर्ने उद्देश्यले आज एकदिने हुर्रा महोत्सव आयोजना गरेका छन् ।

नेपाल मगर सङ्घ त्रियुगा नगरपालिकाको आयोजनामा हुर्रा महोत्सव आयोजना गरिएको मगर सङ्घ त्रियुगा नगरपालिकाका अध्यक्ष ज्ञानेन्द्र मगरले बताए । महोत्सवमा नेपालको पूर्वेली मगरहरूको लोकप्रिय नृत्य हुर्रा नाचको प्रदर्शन गरिएको थियो । मगर जातजातिको भेषभूषाका साथै मगर जातिको खानेकुराको समेत महोत्सवमा व्यापारिक कक्ष राखेर प्रदर्शनी र बिक्री गरिएको आयोजकले जनाएको छ ।

महोत्सवमा उदयपुरको पहाडी क्षेत्र र कटारी, चौदण्डीगढी, बेलाका नगरपालिकासहित सप्तरी, सुनसरी तथा सिन्धुली क्षेत्रका मगर जातिको पनि सहभागिता थियो ।

पश्चिमका मगर जातिको लोकप्रिय नृत्य कौडा र सालैजो जस्तै पूर्वी नेपालको कोशी प्रदेशमा बसोबास गर्ने मगरहरूको हुर्रा नाच लोकप्रिय र प्रख्यात छ । हुर्रा नाच, मगर समुदायका परम्परागत खानाका परिकार, भेषभूषा र भाषा संरक्षणका महोत्सव आयोजना गरिएको नेपाल मगर सङ्घ उदयपुरका पूर्वअध्यक्ष केशव खपाङ्गीमगरले बताए । महोत्सवमा मगर जातिको खानाका परिकार, ढिडो, सेलरोटी, सिन्की, गुन्द्रुकको अचारसहित कोदोको जाँडसमेत राखिएको थियो ।

प्रत्येक वर्ष उदयपुरका विभिन्न क्षेत्रमा हुर्रा महोत्सव आयोजना गर्ने क्रममा यसपटक त्रियुगाको बगाहामा सञ्चालन गरिएको आयोजकले जनाएको छ ।