काठमाडौँ । आईसीसी यू–१९ विश्वकप क्रिकेटको सुपर सिक्समा नेपाल आफ्नो पहिलो खेल खेल्नुअघि नै सेमिफाइनल दौडबाट बाहिरिएको छ ।

भारत र पाकिस्तानले मंगलबार आ–आफ्नो खेल जितेर सेमिफाइनलको सम्भावना बलियो बनाएसँगै नेपालको अर्को चरणमा पुग्ने सम्भावना टुंगिएको हो ।

दक्षिण अफ्रिकामा भइरहेको प्रतियोगितामा नेपालले बुधबार बंगलादेशसँग खेलेर सुपर सिक्स यात्रा सुरु गर्नेछ । ब्लोमफोन्टेनमै नेपालले शुक्रबार भारतसँग सुपर सिक्सको दोस्रो तथा अन्तिम खेल खेल्नेछ । तर त्यसअघि नै नेपालको सेमिफाइनल सम्भावना सकिएको हो ।

नेपालसँगै आयरल्यान्ड र न्युजिल्यान्ड पनि ग्रुप ए को सुपर सिक्सबाट औपचारिक रुपमा बाहिरिएका छन् ।