काठमाडौँ । सत्ता साँझेदार दल जनमत पार्टीको आज केन्द्रीय सचिवालय बैठक बसेको छ । काठमाडौं मध्यबानेश्वरस्थित पार्टी केन्द्रीय कार्यालय बसेको सचिवालय बैठकमा केन्द्र सरकारमा रहिरहने वा बाहिरीनेबारे छलफल भएको छ । बैठकमा सरकारबारे बाहिरिनेबारे छलफल भएपनि ठोस निर्णय नभएको एक नेताले जानकारी दिए ।

उनका अनुसार मधेस प्रदेश सरकारबाट पार्टी बाहिरीएपछि केन्द्र सरकारमा रहने वा बाहिरीने भन्नेमा आज केही नेताहरुले आफ्नो धारणा राखेका थिए । उनिहरुले यसबारेमा पार्टी अध्यक्ष सिके राउतले प्रधानमन्त्री पुष्पकमल दाहाल प्रचण्डसँग छलफल गरेर चाँडो टुंगोमा पुग्नुपर्नेमा जोड दिएका थिए ।

मधेश प्रदेशको सरकार एक वर्ष जसपाले नेतृत्व गर्ने, त्यसपछि जनमतले र कांग्रेसले दुई दुई वर्ष सरकारको नेतृत्व गर्ने सहमति भएको र सो अनुरुप अब सरकारको नेतृत्व आफुहरुले पाउनुपर्ने जनमतको माग छ । सो सहमती अनुरुप काम नभएमा केन्द्र सरकारबाट समेत बाहिरीनुपर्ने भनाइ जनमतका नेताहरुको छ ।

आजको बैठक विशेषत संगठन निर्माण र परिचालनमा केन्द्रित रहेर छलफल भएको पार्टी प्रवक्ता शरद सिंहले जानकारी दिए।

खासगरी अहिले पार्टीको विभिन्न जिल्लामा जारी वडा अधिवेशन, भोलिदेखि हुने संघीय संसद्को हिउँदे अधिवेशनमा पार्टीले खेल्ने भूमिका लगायतका विषयमा छलफल भएको उनले बताए ।

यस्तै आइतबारको बैठकमा मधेश प्रदेशको सरकारबाट पार्टी बाहिरिएको र अब कसरी अघि बढ्ने भन्ने विषयमा समेत छलफल भएको प्रवक्ता सिंहले उनले बताए। यस्तै संघीय सरकारमा सहभागिताको विषयमा समेत समिक्षा भइरहेको उनले बताए ।