काठमाडौँ । नेकपा एमालेका प्रमुख सचेतक पदम गिरीले सरकारका मन्त्रीहरु स्टन्टबाजी गर्न माहिर रहेको आरोप लगाएका छन् । बुधबार प्रतिनिधिसभाको बैठकको विशेष समयमा बोल्दै उनले मन्त्रीहरु काम नगर्ने तर प्रधानमन्त्रीलाई कहिले यशु ख्रिष्ट जस्तो भन्ने कहिले सम्राट अशोक भनेर स्टन्टबाजी गरेर बसिरहेको आरोप लगाए ।

उनले भने– ‘देशका आयोजनाहरु असफल छन्, यस्ता कुराहरुमा मन्त्रीहरुलाई चिन्ता छैन । उहाँहरुलाई स्टन्टबाजमा रहमाउनु छ । कहिले हाम्रो प्रधानमन्त्री यशु ख्रिष्ट जस्तो हुनुहुन्छ, उहाँ त महान हुनुहुन्छ । मन्त्रीज्यूहरु महिमागानमा व्यस्थ हुनुहुन्छ । कहिले सम्राट अशोक जस्तो हुनुहुन्छ भनेर बसेका छन् । स्वय‌ प्रधानमन्त्री पनि पपुलिष्ट हुन आन्दोलन गर्नुस म जातीय राज्य दिन्छु भनेर सस्तो स्टन्टबाजमा रमाउने अवस्था छ ।’

दलालहरुले नेपाली युवाहरुलाई रसियामा लगेर भर्ना गरिरहेको र त्यसलाई सरकारलाई रोक्न नसकेको उनले बताए । रुसमा झन्डै ६ हजार यूवा सेनामा भर्ना भएका र उनीहरु युद्धभूिमबाट रोइकराई गर्दा सरकारले यसबारे केही चिन्ता नलिएको उल्लेख गरे ।

गिरीले सरकार संवेदनशील नबने जनताको आक्रोश वायु बनेर आउने चेतावनी दिए ।

‘वर्तामान सरकारकै कारण हाम्रो समाज जातीय, धार्मिक र अनेक हिसाबमा विभाजित बन्ने र देश अर्को द्वन्द्वमा फस्ने स्थिति सिर्जना भइराखेको छ,’ उनले भने।