काठमाडौं । राष्ट्रपति रामचन्द्र पौडेलसमक्ष शुक्रबार राति नेकपा एमालेका अध्यक्ष केपी शर्मा ओलीले प्रधानमन्त्रीमा दावी गरेसँगै शुक्रबार रातिनै प्रधानमन्त्री नियुक्त गर्ने चर्चा थियो ।

तर शुक्रबार राति ओलीको नियुक्ति र सपथग्रहण हुन सकेन । यससँगै शनिबार नियुक्त हुने आकलन गरिएको थियो । तर राष्ट्रपति कार्यालय स्रोतका अनुसार ओलिको नियुक्ति आइतबारमात्रै हुनेछ । आइतबारपनि साँझ पाँच बजेपछिमात्रै नियुक्त गर्ने राष्ट्रपति कार्यालयको तयारी छ । नयाँ सरकार गठनका लागि आइतबार ५ बजेसम्मको समय दिइएकाले नियुक्ति र सपथपनि सोही समयपछि मात्रै गर्ने तयारी गरिएको छ ।

नियुक्ति दिउँसाे गरेर सपथ पाँचबजेपछिमात्रै गर्ने कि नियुक्ति पनि पाँच बजेपछि गर्नेभन्नेबारे राष्ट्रपति आन्तरिक छलफलमा छन् । त्यतिन्जेल कामचलाउ सरकारकाे जिम्मेवारी प्रधानमन्त्री प्रचण्डलाईनै राष्ट्रपतिले ताेकेका छन् । संविधानको धारा ७६ को उपधारा २ बमोजिम ओलीलाई प्रधानमन्त्रीमा नियुक्त गर्न एमाले र कांग्रेसले राष्ट्रपतिलाई सांसदहरुको हस्ताक्षरसहित बुझाइसकेका छन् ।

३ वर्षअघि सर्वाेच्च अदालतको परमादेशबाट सत्ताच्युत भएका अ‍ोली सत्ताराेहण गर्दैछन् । प्रधानमन्त्री नियुक्त हुन लागेका ओलीलाई अन्य सातवटा दलले समेत समर्थन जनाइसकेका छन् ।