काठमाडौं ।  पूर्व गृहमन्त्री एवं राष्ट्रिय स्वतन्त्र पार्टी (रास्वपा) का सभापति रबि लामिछानेलाई पक्राउ गरेको बिरोधमा आज शनिबार काठमाडौंमा रास्वपाका कार्यकर्ताले प्रदर्शन गरेका छन् । 

रास्वपाका नेता कार्यकर्ताले माइतीघर मण्डलामा लामिछाने पक्राउको बिरोध गर्दै प्रदर्शन गरेका हुन् । लामिछानेलाई हिजो शुक्रबार साँझ सहकारी ठगी र संगठित अपराधमा अनुसन्धानका लागि प्रहरीले काठमाडौंबाट पक्राउ गरेको थियो । उनलाई शुक्रबार नै पोखरा लगिएको थियो । प्रदर्शनमा उत्रिएका रास्वपाका कार्यकर्ताहरुले  सरकारविरुद्ध चर्काे नाराबाजी गरेका छन् ।  

लामिछानेलाई संसदीय छानबिन विशेष समितिले पोखराको सुर्य दर्शन लगायतका सहकारीको बचत अपचलन गरेको निष्कर्ष निकालेको थियो । समितिले उनलाई सहकारी बचत अपचलन गरेकोमा अनुसन्धान गर्न सिफारिस गरेको थियो ।

लामिछानेमाथि गोर्खा मिडिया नेटवर्कको तत्कालीन प्रबन्ध निर्देशक हुँदा सहकारीको बचत सो मिडियामा लगेर अपचलन गरेको आरोप छ । प्रदर्शनकारीहरूले वास्तविक सहकारी ठगीलाई कारबाहीको माग गरेका छन् भने रवि लामिछाने निर्दोष रहेको दाबी गरेका छन् । लामिछानेसँग राजनीतिक प्रतिशोध साँध्न खोजिएको पनि रास्वपाका कार्यकर्ताको दाबी छ ।काठमाडौंमा प्रदर्शन गर्नु अघि रास्वपाका कार्यकर्ताले आजै पोखरामा पनि प्रदर्शन गरेका थिए ।