काठमाडौं । नेपाल प्रिमियर लिग (एनपीएल)को फ्रेन्चाइज टोली सुदूरपश्चिम रोयल्सले आफ्नो जर्सी सार्वजनिक गरेको छ ।

मंगलबार राजधानीमा आयोजित कार्यक्रमका बीच टिम ओनर स्वतन्त्रप्रताप शाह, मार्की प्लेअर दीपेन्द्र सिंह ऐरी र सुदूरपश्चिमका ब्राण्ड एम्बासडर दीपक विष्टले संयुक्त रुपमा जर्सी सार्वजनिक गरेका हुन् ।

सुदूरपश्चिमको जर्सी पहेंलो रङको छ । जर्सी ड्रोनमार्फत पनि सार्वजनिक गरिएका थियाे। मार्की खेलाडी दीपेन्द्रसिंह ऐरीको नाम र नम्बर अंकित जर्सी ड्रोनमार्फत कार्यक्रम हलमा प्रवेश गराएर रिभेल गरिएको हो । कार्यक्रममा ऐरी जर्सी लगाएर समेत उपस्थित भएका थिए ।

यस्तै सुदूरपश्चिम रोयल्सले आफ्नाे एन्थम पनि सार्वजनिक गरेकाे छ । चक्र बम, टङ्क तिमिल्सिना, अनिता चलाउनेले गाएकाे एन्थम सार्वजनिक गरिएकाे हाे।

कार्यक्रममा सुदूरपश्चिमका मुख्य प्रशिक्षक राष्ट्रिय टिमका पूर्वप्रशिक्षक जगत टमाटा र ओनर स्वतन्त्र प्रताप शाहले यसवर्षको एनपीएल ट्रफी आफूहरुले उचाल्ने दावी गरे ।

क्यानको आयोजनामा एनपीएल मंसिर १५ देखि पुस ६ गतेसम्म हुँदैछ ।