आदरणीय गगन थापाजी, यो पत्र तपाईंलाई लेख्दै गर्दा म मेरो व्यक्तिगत अनुभव, पीडा, र आशाहरू व्यक्त गर्न चाहन्छु। सूचना प्रविधि (आईटी) को विकासबारे हामीले झण्डै एक दशकदेखि बहस गरिरहेका छौं। नेपाललाई डिजिटल युगमा अघि बढाउने ठूलो सम्भावना भए पनि यस क्षेत्रले सरकारबाट अपेक्षित प्राथमिकता कहिल्यै पाएन।

केही दिन अघि, तपाईंले कीर्तिपुरमा दिएको अभिव्यक्ति मलाई धेरै हदसम्म सही लाग्यो। तर, तपाईंले उठाएको विषयको समयमा म असन्तुष्ट छु। किनभने यो विषय प्रायः चुनावको समयमा मात्र उठाइन्छ, र त्यसपछि प्राथमिकतामा कहिल्यै पर्दैन। गगन जी, नेपालमा आईटी क्षेत्रमा काम गर्न असाधारण चुनौतीहरूसँग जुध्नुपर्छ।

देशका सम्मानित व्यक्तिहरू जस्तै रुद्र पाण्डे दाई र अन्य धेरै व्यक्तिहरू यस क्षेत्रमा निष्ठापूर्वक काम गरिरहेका छन्। तर, उनीहरूले समेत आफ्नो कामलाई सहज रूपमा अघि बढाउन उचित वातावरण पाउनुभएको छैन। मैले पनि यस क्षेत्रमा नेपालमा ९ वर्ष बिताएको छु। मेरो अनुभवमा, सरकारबाट कुनै पनि प्रकारको प्रोत्साहन, सहयोग, वा सुविधाजनक नीति मैले देख्न पाएको छैन। बरु, विभिन्न समयमा निरुत्साहित गर्ने व्यवहार र असहयोगपूर्ण वातावरणको सामना गर्नुपर्‍यो।

धेरै लगानीकर्ता छन्, जो नेपालमा आईटी क्षेत्रमा लगानी गर्न इच्छुक छन्। तर, उनीहरू उचित पूर्वाधारको अभाव, कानूनी सुरक्षाको कमी, र नीतिगत अस्पष्टताको कारण डराउँछन्। जबसम्म यो क्षेत्रलाई सुरक्षित र व्यवस्थित बनाउने काम गरिँदैन, त्यस्ता लगानीकर्ताहरूले अगाडि बढ्ने हिम्मत गर्दैनन्।

तपाईं र तपाईंको पार्टी सरकारमा लामो समयदेखि रहेका छ। यस्तो अवस्थामा, यो तपाईंहरूको दायित्व हो कि सूचना प्रविधिको क्षेत्रमा काम गर्नेहरूलाई प्रोत्साहन दिने, ठोस नीतिहरू लागू गर्ने, र आईटी क्षेत्रलाई देशको विकासको केन्द्रविन्दु बनाउने। हामीले एउटा डिजिटल नेपालको सपना देखेका छौं, जहाँ युवाहरूले विदेश पलायन नगरी नेपालमै आफ्ना क्षमता देखाउन सकून्।

तर, यसका लागि सरकारबाट पर्याप्त लगानी, नीति कार्यान्वयन, र सकारात्मक वातावरणको खाँचो छ। तपाईंको नेतृत्व क्षमतामा विश्वास छ। तपाईंले यस क्षेत्रमा ठोस कदम चालेर सरकारलाई सक्रिय बनाउनुहुने अपेक्षा गर्दछु। केवल चुनावी समयमै मात्र नभई, सधैं यो विषयलाई प्राथमिकतामा राख्न आग्रह गर्दछु।

हामी, यो क्षेत्रसँग जोडिएका व्यक्तिहरू, आशावादी छौं कि तपाईंले हाम्रो आवाजलाई सुनिदिनुहुनेछ र नेपाललाई आईटी क्षेत्रमा नयाँ युगतर्फ अघि बढाउन विशेष भूमिका खेल्नुहुनेछ। सुधार र विकासको पक्षमा सहयोग गर्नुहुनेछ भन्ने अपेक्षा लिएकाे छु । सरोज बस्नेत ( बस्नेत हाल अमेरिका छन् )