काठमाडौं । परराष्ट्रमन्त्री आरजु राणा देउवा र इजरायलका विदेशमन्त्री गिडियन सारबीच मंगलबार साँझ फोनवार्ता भएको छ ।

हमास अतिवादी समूहको नियन्त्रणमा रहेका नेपाली युवा विपन जोशीको रिहाइका लागि परराष्ट्रमन्त्री राणाले आज (मंगलबार) साँझ इजरायलका विदेशमन्त्री सारसँग फोनवार्ता गरेकी हुन् ।

हमासले आफ्नो नियन्त्रणमा रहेकामध्ये केहीलाई मुक्त गर्न लागेको समाचार आएपछि परराष्ट्रमन्त्री राणाले विपीनको रिहाइका लागि पहल गरिदिन विदेशमन्त्री सारमार्फत् इजरायल सरकारसँग आग्रह गरेकी छन् ।

फोनवार्तामा मन्त्री राणाले इजरायल सरकारले विपीनसहित सबै बन्दीका पक्षमा निर्वाह गरिरहेको भूमिकाका लागि धन्यवाद दिँदै नेपाली युवा विपीनलाई हमासको नियन्त्रणबाट मुक्त गराउन पहल गर्न विशेष आग्रह गरेकी थिइन् ।

त्यस अवसरमा मन्त्री सारले विपीनको सकुशल रिहाइका लागि इजरायल सरकारले अधिकतम प्रयास गरिरहेको जानकारी मन्त्री राणालाई गराएका थिए ।

साथै विदेशमन्त्री सारले आज बिहान परराष्ट्रमन्त्री राणाले कतारका विदेश राज्यमन्त्रीसँग कुराकानी गरेकोमा खुसी व्यक्त गरेका थिए ।

कतारका मन्त्री हमाससँगको शान्तिवार्ताका प्रमुख वार्ताकार एवं मध्यस्थकर्ता भएकाले उनको भूमिका महत्त्वपूर्ण रहेको इजरायली विदेशमन्त्रीको भनाइ थियो ।     

आज बिहान नै मन्त्री राणाले कतारका विदेश राज्यमन्त्री डा मोहम्मद बिन अब्दुलाजिज अल–खुलाइफीसँग फोनवार्ता गरी सोही आग्रह गरेकी थिइन् ।

हमास समूहले केही बन्दी रिहा गर्न लागेको समाचारपछि मन्त्री डा. राणाले इजरायल सरकार र हमाससँग सम्पर्कमा रहेर युद्धविरामका लागि मध्यस्थता गरिरहेका कतार र इजिप्टसँग सम्पर्क गरी विपीनको रिहाइका लागि अपिल गरिरहेकी छन् । गत हप्तामात्र उनले इजिप्ट सरकारसँग पनि सो आग्रह गरेकी थिइन् ।

विपीनको रिहाइका लागि नेपाल सरकारले आफ्नो कूटनीतिक प्रयासलाई जारी राखेको छ । मन्त्री राणाले संयुक्त राष्ट्रसंघ, अन्तर्राष्ट्रिय एवं क्षेत्रीय मञ्चहरू र बैठकहरूमार्फत विपीनको रिहाइका लागि आग्रह गर्दै आएकी छन् ।