काठमाडौं । बलिउड अभिनेता सैफ अली खानमाथि आक्रमण भएको १० दिनपछि यस मुद्दामा नयाँ ट्विष्ट आएको छ ।

यस घटनामा प्रहरीले बंगलादेशी नागरिक भनिएका आक्रमणकारी शरिफूल शहजादलाई पक्राउ गरेर विभिन्न कोणबाट अनुसन्धान गरिरहेको छ । यसैबीच घटनामा नयाँ ट्विष्ट आएको छ ।

जानकारी अनुसार सीआईडीको अनुसन्धानमा अपराध स्थलबाट भेटिएका औँठाछापहरू कथित अभियुक्त शहजादको औँठाछापहरूसँग मेल खाएका छैनन् । मुम्बई प्रहरीले औँठाछापहरू अनुसन्धानको लागि सीआईडीलाई पठाएको थियो ।

अहिले प्रहरीले अनुसन्धानका लागि थप नमुनाहरू पठाउँदै छ ।

आरोपी शहजादका बुबाले पनि प्रहरीले मुद्दामा गलत व्यक्तिलाई पक्राउ गरेको दाबी गरेका छन्।

सीआईडीको यो रिपोर्टसँगै प्रहरी अनुसन्धानमाथि प्रश्न उठेको छ ।

जनवरी १६ को बिहान बान्द्राको सतगुरु शरण भवनको १२ औँ तलामा रहेको अपार्टमेन्टमा सैफ अली खानमाथि चक्कु प्रहार भएको थियो । आक्रमणमा उनको घाँटी, हात र मेरुदण्डमा गम्भीर चोट लागेको थियो । आक्रमणपछि उनको लीलावती अस्पतालमा उपचार भएको थियो ।

सैफलाई जनवरी २१ मा अस्पतालबाट डिस्चार्ज गरिएको थियो । हाल उनको अवस्था सुधारोन्मुख छ ।