काठमाडौं । भारत, उत्तर प्रदेशको प्रयागराजमा जारी महाकुम्भ मेलाको संगम तटमा भागदौड मच्चिएपछि दर्जनभन्दा धेरैको ज्यान गएको छ।  स्थानीय समय अनुसार बुधबार बिहान करिब २ बजे भएको यस घटनामा कम्तिमा १४ जनाको मृत्यु भएको भारतीय सञ्चारमाध्यमले जानकारी दिएका छन्।

  तर प्रशासनले मृतक वा घाइतेको संख्याबारे औपचारिकरुपमा जानकारी दिएको छैन।  भागदौडपछि प्रशासनको आग्रहमा १३ वटै अखाडाले आज मौनी अमावस्याको अमृत स्नान रद्द गरेका छन्। अखाडा परिषद्का अध्यक्ष रवीन्द्र पुरीले भने, “संगम नाकामा अत्याधिक भीडभाडका कारण यस्तो निर्णय गरिएको हो।”

  घटनालाई लिएर प्रधानमन्त्री नरेन्द्र मोदीले मुख्यमन्त्री योगी आदित्यनाथसँग फोनमा कुरा गरेका छन्। संगममा केही महिलाहरू भुइँमा लडे, मानिसहरूले उनीहरूलाई कुल्चिएको, एम्बुलेन्समा राखेर उद्धार गर्दै गरेका तस्बिर र भिडियो सार्वजनिक भएका छन् ।