काठमाडौं । भारतीय वायुसेनाले ‘अपरेसन सिन्दूर’ अझै जारी रहेको जनाएको छ ।

सामाजिक सञ्जाल एक्समार्फत वायुसेनाले भनेको छ, “भारतीय वायुसेनाले अपरेशन सिन्दुरमा आफ्नो तोकिएको कार्यहरू सटीकता र व्यावसायिकताका साथ सफलतापूर्वक सम्पन्न गर्‍यो । यी अपरेशनहरू राष्ट्रिय उद्देश्यहरू अनुरूप सोचविचार र विवेकपूर्ण रूपमा सञ्चालन गरिएको थियो ।”

“अपरेसनहरू अझै जारी छन्, त्यसैले थप जानकारी पछि प्रदान गरिनेछ । भारतीय वायुसेनाले सबैलाई अनुमान र अप्रमाणित जानकारीको प्रसारबाट बच्न अनुरोध गर्दछ” वायुसेनाले भनेकाे छ।

जम्मु-कश्मीरको पहलगाममा अप्रिल २२ का दिन भएको आतंककारी हमलामा २६ जनाको ज्यान गएपछि भारतले पाकिस्तानविरुद्ध ‘अपरेसन सिन्दूर’ नाम दिएर सैन्य कारबाही सुरु गरेकाे थियाे। त्यसपछि दुवै देशले एकअर्काको सैन्य अड्डाहरूमा आक्रमण गरेका थिए ।

शनिबार साँझ मात्र भारत र पाकिस्तानले एकअर्काविरुद्ध कारबाही नगर्ने सहमति गर्दै युद्धविराम सम्झौता गरेका थिए।