काठमाडौं । गभर्नर विश्वनाथ पौडेलले राष्ट्र बैंकका कार्यकारी निर्देशक गुणाकर भट्टलाई गभर्नर कार्यालयमा सरुवा गरेका छन् । गभर्नर बन्ने संकेत मिलेपछि कार्यकारी निर्देशकबाट राजीनामा दिएका भट्टको राजीनामा अस्वीकृत गर्दै गभर्नर पौडेलले उनको सरुवा गरेका हुन् । भट्टलाई आर्थिक अनुसन्धान विभागबाट गभर्नरको कार्यालयमा सरुवा गरिएको हो । राष्ट्र बैंकको यो कार्यालय प्रकाश श्रेष्ठले सम्हाल्दै आएका थिए । अहिले राष्ट्रिय योजना आयोगको सदस्य रहेका श्रेष्ठको अवकाश पनि भइसकेको छ । श्रेष्ठले अवकाश पाएसँगै भट्टलाई उक्त कार्यालयको जिम्मेवारी दिइएको हो ।

केही महिनाअघि गभर्नरको दौडका क्रममा भट्टले कार्यकारी निर्देशकबाट राजीनामा दिएका थिए । उक्त राजीनामा कामु गभर्नर निलम ढुंगानाले स्कीकृत नगर्दा भट्ट गभर्न बन्न रोकिएका थिए । कांग्रेस र  एमालेबीच गभर्नरमा भट्टलाई लैजाने सहमति भएपछि ढुंगानाले उनको राजीनामा अस्वीकृत गरेकी हुन् । गभर्नरको दौडमा रहेकी ढुंगानाले आफ्नो प्रतिस्पर्धा घटाउनकै लागि  भट्टको राजीनामा अस्वीकृत गरेकी थिइन् । 

भट्टको राजीनामा अस्वीकृतसँग गभर्नर नियुक्ति प्रक्रिया गिजोलिएको थियो । त्यही  क्रममा भट्टको विकल्पमा पौडेल गभर्नर नियुक्त भएका हुन् । पौडेलले भट्टलाई बलियो सहयोगीको रूपमा अगाडि सार्न खोजेका छन् । राजीनामा अस्वीकृत भएपछि अमेरिका गएका भट्टले आधिकारिक रूपमा सार्वजनिक धारणा भने व्यक्त गरेका छैनन् ।