काठमाडौं । काठमाडौं महानगरपालिकाका मेयर बालेन्द्र शाह (बालेन) र उपमेयर सुनिता डंगोलबीच लामो समयपछि भेट भएको छ । बुधबार महानगरकाे कार्यालयमा वडाध्यक्षसहित उनीहरुबीच भेटवार्ता भएको हो ।

छलफलमा वडा-१७ का वडाध्यक्ष नवीन मानन्धर, वडा-३२ का वडाध्यक्ष नवराज पराजुली र वडा-१५ का वडाध्यक्ष ईश्वरमान डंगोल सहभागी थिए । उनीहरुबीच २ घण्टा छलफल भएको थियो । बैठकपछि मेयर साह महानगरपालिकाको कार्यपालिका बैठक र नगर सभा बोलाउने सहमतिमा पुगेका छन् ।

बुधबारै अपराह्न करिब ४ बजेतिर मेयर र उपमेयरबीच छुट्टै भेटवार्ता भएको थियो । आज पनि उनीहरूबीच भेटवार्ताको तयारी रहेकाे बुझिएको छ ।

महानगरका प्रमुख प्रशासकीय अधिकृत सरोज गुरागाईंसँगको विवादपछि मेयर र उपमेयरबीचको दूरी बढेको थियो । विवाद सिर्जना भएसँगै उनीहरुकाे करिब अढाई महिनासम्म बोलचाल समेत भएको थिएन ।

आन्तरिक विवादकै कारण महानगरमा ०८१ पुस ८ गतेयता नगरकार्यपालिकाको बैठक बसेको छैन ।