काठमाडौं । इजरायल र इरानबीच दोस्रो दिनसम्म पनि भिडन्त जारी रहयो । 

इरानमा पछिल्लो दुई दिनमा १३८ जनाको मृत्यु भएको जनाइएको छ । 

इजरायलले शुक्रबार राति १०ः३० बजे इरानको आणविक स्थलमा दोस्रो पटक लडाकु विमानबाट आक्रमण गरेको थियो । यस आक्रमणमा ६० जनाको मृत्यु भएको थियो जबकी सो घटनामा परी ३५० भन्दा बढी घाइते भएको जनाइएको छ ।

यसअघि इरानमा शुक्रबार बिहान ५ः३० बजे भएको आक्रमणमा ७८ जनाको मृत्यु भएको थियो । जसमा ९ आणविक वैज्ञानिक र २० भन्दा बढी इरानी सैन्य कमाण्डरहरू पनि सामेल थिए। 

जवाफमा इरानले पनि इजरायलमा १५० भन्दा बढी क्षेप्यास्त्र प्रहार गरेर बदला लिएको छ, जसमध्ये ६ वटा रकेट राजधानी तेल अवीभमा खसेको जनाइएको छ । सो घटनामा परी इजरायलमा हालसम्म ३ जनाको मृत्यु भइसकेको छ, जसमध्ये ७ सैनिकसहित ९० भन्दा बढी घाइते भएका छन् । इजरायलका प्रधानमन्त्री बेन्जामिन नेतान्याहुलाई सुरक्षित स्थानमा सारिएको छ। 

इरानले इजरायली रक्षा मन्त्रालयमा पनि मिसाइल खसाएको दाबी गरेको छ तर इजरायलले यसको पुष्टि गरेको छैन्। इजरायलका रक्षामन्त्री इजरायल काट्जले शनिबार इरानलाई चेतावनी दिएका छन् कि यदी इरानी सर्वोच्च नेता आयोतुल्लाह खामेनीले थप मिसाइलहरू प्रहार गरे भने इरानको राजधानी तेहरान जल्नेछ। 

यसैबीच, इरानले तीनवटा  इजरायलको एफ–३५ लडाकु विमान खसालेको दाबी गरेको छ । इरानको सेनाले अर्को एफ–३५ लडाकु विमान खसालेको दाबी गरेको छ । तेहरान टाइम्सको रिपोर्टका अनुसार इरानी सेनाले तेस्रो इजरायली एफ–३५ लाई खसाल्न सफल भएको बताएको छ ।

साथै, इरानले एफ–३५ पाइलटलाई पनि नियन्त्रणमा लिएको दाबी गरेको छ । इरानले अहिलेसम्म दुईजना एफ–३५ पाइलटलाई जिउँदै नियन्त्रणमा लिएको दाबी गरेको छ भने एकजना आक्रमणमा मारिएका छन् । इरानी सेनाले पनि १५० भन्दा बढी इजरायली सैन्य र गुप्तचर लक्ष्यहरूलाई नष्ट गरेको वा नराम्ररी क्षति पुर्याएको दावी गरेको छ।