काठमाडौँ । भक्तपुर उद्योग वाणिज्य संघको आयोजना तथा उद्योग तथा वाणिज्य कार्यालय भक्तपुरको सहकार्यमा आजदेखि तीन दिने भक्तपुर औद्योगिक प्रवर्द्धन व्यापार मेला सुरु भएको छ ।

भक्तपुरमा पर्यटन प्रवर्द्धन गर्ने, यहाँका स्थानीय उत्पादनलाई राष्ट्रिय तथा अन्तरराष्ट्रिय बजारमा पुर्‍याउने, भक्तपुरको मौलिक उत्पादन एवं स्थानीय स्रोत र साधनबाट उत्पादित हस्तकलाका सामानहरू, माटोको भाडोहरु पौवा चित्रहरू, लत्ताकपडाहरू, विभिन्न जातका बिरुवाहरू, खाद्यान्नको प्रदर्शनी गरिएको संघका महासचिव नवीन प्रजापतिले जानकारी दिए ।

राष्ट्रिय तथा अन्तरराष्ट्रियस्तरमा बजार प्रवर्द्धन गर्न र उद्योग, व्यापार, कृषि, पर्यटन, संस्कृतिको प्रवर्द्धन गरी जिल्लाको आर्थिक विकासमा टेवा पुर्‍याउने उद्देश्यले आजबाट सुरु भएको तीन दिने मेला करिब ५५ हजारले अवलोकन गर्ने अनुमान गरिएको छ ।

मेलामा मौलिक हस्तकलाका उत्पादनहरू, कृषि उत्पादनहरू, साना तथा मझौला उद्यमीहरुद्वारा उत्पादित सामग्रीहरू, मेलामा स्थानीय खानाका स्टलहरू, रहेको महासचिव प्रजापतिले बताए ।

स्थानीय सीप हस्तान्तरण तथा जगेर्ना गर्ने उद्देश्यले हस्तकलाका सामग्री निर्माण, पौभा पेन्टिङ, मुकुण्डो बनाउने, माटोका भाडाकुँडा बनाउने, चित्रकला, मूर्ति बनाउने कार्य प्रत्यक्ष प्रदर्शनी हुने उनको भनाइ छ । मेलामा बालबालिकाहरूलाई मनोरञ्जनको लागि बाल उद्यानको व्यवस्था गरिएको छ ।

मेलामा भक्तपुर, काभ्रे र काठमाडौँका उद्यमीहरूको ४५ वटा स्टल रहेको र रु एक करोडसम्म बिमा व्यवस्था गरिएको आयोजकले जनाएको छ । सो मेलाको उद्घाटन आज बागमती प्रदेशसभा सदस्य सुरेन्द्रराज गोसाईं गरे ।