काठमाडौँ । राष्ट्रिय प्रजातन्त्र पार्टी (राप्रपा)का प्रमुख सचेतक ज्ञानबहादुर शाहीले आजमात्रै पदबाट राजीनामा दिएका संघीय मामिला तथा सामान्य प्रशासनमन्त्री राजकुमार गुप्तालाई पक्राउ गर्न माग गरेका छन् ।

मंगलबार प्रतिनिधिसभा बैठकमा बोल्दै गुप्ताले मन्त्री पदबाट राजीनामा दिएर मात्रै नपुग्ने भन्दै पक्राउ गरेर छानबिन गर्न उनले माग गरे । ‘राजीनामा दिँदैमा समाधान हुँदैन । तत्काल पक्राउ गरेर छानबिन गरियोस् । उनीहरूमाथि छानबिन गरियोस् । गिनिज बुकमा नाम लेखाउनुस् । अहिलेको सरकारले भ्रष्टाचारीको पनि देश हो भनेर नाम लेखाओस्,’ उनले भने ।

सचेतक शाहीले प्रधानमन्त्री केपी शर्मा ओली नेतृत्वको मन्त्रिपरिषद् भ्रष्टाचार गर्ने ठाउँ भएको टिप्पणी गरे । ‘पहिला-पहिला एउटा चलन थियो अहिले पनि छ । ज्ञान नपाए काशी जानु, न्याय नपाए गोरखा जानु, भ्रष्टाचार गर्न नपाए केपी ओलीको क्याबिनेटमा जानु । खुलमखुला मन्त्री क्वार्टरमा गएर पैसा दिइएको छ । मन्त्रीले राजीनामा दिएर स्वीकृत हुन्छ । अख्तियार दुरुपयोग अनुसन्धान आयोग बनाएका छौँ, यो देशमा । अख्तियारले के गरेर बसेको छ ?,’ उनले भने ।

भिडियाे :