काठमाडौं । जिल्ला प्रशासन कार्यालय काठमाडौंले राष्ट्रपति कार्यालय शीतलनिवासक्षेत्र र सिंहदरबार क्षेत्रमा कर्फ्यु आदेश जारी गरेको छ ।

जेन-जी पुस्ताको आन्दोलन उग्र बनेपछि प्रशासन कार्यालयले यसअघि बानेश्वर क्षेत्रमा कर्फ्यु जारी गरेकाे थियाे ।

अहिले कर्फ्युको दायरा बढाइएको हो ।

राष्ट्रपति भवन रहेको महाराजगञ्ज क्षेत्र, उपराष्ट्रपति भवन लैनचौर क्षेत्र, प्रमुख प्रशासनिक केन्द्र सिंहदरबार क्षेत्र र नारायणहिटी क्षेत्रमा अहिले १ बजेदेखि राति १० बजेसम्मका लागि कर्फ्यु लगाइएको छ ।

कर्फ्यु लागू भएका क्षेत्रमा आवतजावत, भेला, प्रदर्शन, घेराउ केही पनि नगर्न भनिएको छ ।