काठमाडौं । नेपाली राष्ट्रिय महिला फुटबल टिमकी कप्तान सावित्रा भण्डारीले आफूहरू इरानविरुद्ध चुनौती पेस गर्न तयार रहेको बताएकी छन् ।

शुक्रबार नेपालले त्रिदेशीय मैत्रीपूर्ण फुटबलअन्तर्गत इरानसँग प्रतिस्पर्धा गर्दैछ ।

“नेपाल इरानविरुद्ध खेल्न तयार छ । यहाँ (भारत) आइसकेपछि हामीले मैदानको पनि अवलोकन गरिसकेका छौँ । हामी सबै इरानविरुद्ध खेल्न मानसिक र शारीरिक रूपमा तयार छौँ,” कप्तान सावित्राले भनिन् ।

खेल भारतको सिलोङस्थित जवाहारलाल नेहरु रंगशालामा नेपाली समयानुसार बेलुका ६ः१५ बजे सुरु हुनेछ ।

त्रिदेशीय खेलअन्तर्गतको उद्घाटन खेलमा भारत र इरान भिडेका थिए। जसमा इरानले घरेलु टोलीमाथि २-० गोलको जित दर्ता गर्दै प्रतियोगितामा सुखद् सुरुवात गरिसकेको छ।