काठमाडौं। एयर फोर्स वन– अमेरिकी राष्ट्रपति डोनाल्ड ट्रम्पले दक्षिण कोरियामा चिनियाँ राष्ट्रपति सी जिनपिङसँगको भेटलाई ‘अत्यन्तै सफल’ भन्दै चीनमाथि लगाइएको कर घटाउने घोषणा गरेका छन् ।

ट्रम्पका अनुसार भेटपछि बेइजिङले दुर्लभ पृथ्वी तत्वहरूको निर्यात पुनः सुरु गर्ने र अमेरिकी सोयाबिन खरिद गर्न सहमति जनाएको छ ।

उनले एयर फोर्स वनमा पत्रकारहरूसँग भने, “हामीले यस वर्षको सुरुमा चीनलाई फेन्टानिल उत्पादनमा प्रयोग हुने रसायनहरू बेचेकोमा सजायस्वरूप लगाएको करलाई २० प्रतिशतबाट १० प्रतिशतमा घटाउँदैछौं ।”

यससँगै चीनमाथिको कुल कर दर ५७ प्रतिशतबाट घटेर ४७ प्रतिशत पुगेको छ ।

ट्रम्पले हाँस्दै भने, “शून्यदेखि १० को मापनमा १० सबैभन्दा राम्रो हो भने म यो बैठकलाई १२ भन्नेछु ।”

उनले आगामी अप्रिलमा चीन भ्रमण गर्ने र राष्ट्रपति सी पनि छिट्टै अमेरिका आउने योजना रहेको बताए ।

साथै, एनभिडियाले चीनसँग उच्च प्रविधियुक्त कम्प्युटर चिप्स निर्यातबारे छलफल गर्न लागेको जानकारी पनि दिए ।

उनले निकट भविष्यमै दुई देशबीच व्यापार सम्झौतामा हस्ताक्षर हुन सक्ने विश्वास व्यक्त गर्दै भने, “हामीबीच अब ठूला अवरोधहरू बाँकी छैनन् ।”

दक्षिण कोरियाको बुसान सहरमा करिब १०० मिनेट लामो वार्तापछि दुवै नेताले तनाव घटाउने र सहकार्य गर्ने प्रतिज्ञा व्यक्त गरे ।

राष्ट्रपति सीले भने, “हाम्रो राष्ट्रिय पृष्ठभूमि फरक भए पनि सहकार्य अपरिहार्य छ ।”

यसअघि अमेरिकाले चीनमाथि थप १०० प्रतिशत आयात कर लगाउने चेतावनी दिएको थियो, तर चीनले दुर्लभ पृथ्वी तत्वहरूको निर्यात नियन्त्रण शिथिल गर्ने र अमेरिकी कृषि उत्पादन खरिद बढाउने संकेत गरेपछि वातावरण सहज बनेको थियो ।

ट्रम्पले उक्त वार्तालाई ‘जी–२ बैठक’ का रूपमा व्याख्या गर्दै यसलाई अमेरिका–चीनको विश्व अर्थतन्त्रमा अग्रणी भूमिकाको प्रतीक भने ।

बजारले पनि यसलाई सकारात्मक रूपमा लिएको छ, यद्यपि विश्लेषकहरूले यो प्रगति अस्थायी हुन सक्ने चेतावनी दिएका छन् ।

ट्रम्प प्रशासनले गत वर्षदेखि चीनमाथि चरणबद्ध रूपमा नयाँ कर लगाउँदै आएको थियो, जसको एक हिस्सा फेन्टानिलसम्बन्धी नीतिसँग जोडिएको थियो ।

तर, हालको सहमतिको परिणामस्वरूप यो दर ४७ प्रतिशतमा झरेको छ र तुरुन्तै लागू हुने ट्रम्पको भनाइ छ ।

अब राष्ट्रपति सी एपेक शिखर सम्मेलनका लागि दक्षिण कोरियामा केही दिन बस्नेछन् भने राष्ट्रपति ट्रम्प वासिङ्टन फर्कने तयारीमा छन् ।