काठमाडौं । नेकपा (एकीकृत समाजवादी)का महासचिव घनश्याम भुसालले माओवादीसहितको नौ समूहको एकताले निकास नदिने टिप्पणी गरेका छन् ।

बुधबार पत्रकार सम्मेलन गरेर उनले यस्ताे बताएका हुन् । उनले कमजोर र ओरालो लागेकाहरूको एकताले उकालो लागिन्छ भन्ने भाष्य बनाउन खोजिएको बताए ।

“ओरालो लागेकाहरूको एकताले उकालो लागिन्छ भन्ने भाष्य बनाउन खोजिँदै छ । जो आफैँ ओरालो हिँड्दै छन् । यसले निकास दिँदैन,” उनले भने ।

नेता भुसालले वाम आन्दोलनका लागि एमाले कसैको विकल्प नभएको पनि बताए ।

“एमाले चाहिँ निकास हो भनेर हामीमाथि मान्छेले प्रश्न गर्नेछन् । निसन्देहः नेकपा (एमाले) आज वाम आन्दोलनका लागि कसैको विकल्प होइन । फासिजमको नाजिजमको केही केही हेर्दाखेरि उग्र व्यक्तिवाद, उग्र निरंकुशता, क्रूरता,” उनले भने ।