काठमाडाैं । नेपाली कांग्रेसको भ्रातृ संस्था नेपाल विद्यार्थी संघका केन्द्रीय अध्यक्ष दुजाङ शेर्पाले एमाले नेता महेश बस्नेतलाई रातो मसी छ्याप्नेमाथि कडा कारबाही हुने बताएका छन्।

आइतबार विराटनगर विमानस्थलनजिकै बस्नेत चढेको गाडीमा युवाहरूले रातो रङ (मसी) छ्यापेका थिए । यो कार्यमा संलग्न रहेको आरोपमा प्रहरीले विराटनगर-२ का १९ वर्षीय अर्पित कुँवर र विराटनगर-१ का २५ वर्षीय सन्जोग गौतमलाई पक्राउ गरेको छ।

गौतम र कुँवर नेविसंघका नेताहरू हुन् ।

अध्यक्ष शेर्पाले संगठनको नाम दुरुपयोग गर्नेहरूलाई कडा कारबाही गरिने भन्दै शेर्पाले बस्नेतमाथि मसी छ्याप्ने कायरता नेविसंघको नभएको समेत वक्तव्यमार्फत प्रष्ट पारेका छन् ।

‘लोकतन्त्रमा विरोध सबैको अधिकार हो तर आज विराटनगरमा महेश बस्नेतमाथि रातो मसी छ्याप्ने कायरता नेविसंघको होइन। संगठनको नाम दुरुपयोग गर्नेहरूलाई कडा कारबाही गरिन्छ,’ उनले भनेका छन्।