काठमाडौं । नेकपा एमालेकाे आसन्न ११औँ महाधिवेशनमा उपत्यकाबाट केन्द्रीय सदस्यका लागि युवा नेता हिमेश केसीले दावी पेश गरेका छन् । २०७९ को प्रतिनिधिसभा निर्वाचनमा काठमाडौं क्षेत्र नं. १० बाट एमालेका उम्मेदवारका रूपमा प्रतिस्पर्धा गरेका केसी स्थानीय र केन्द्रको राजनीतिमा प्रभावकारी रुपमा क्रियाशील छन् ।

लोकप्रियता र संगठनात्मक रूपमा महाधिवेशनमा उपत्यकाबाट केन्द्रीय सदस्यका लागि उनी सबैभन्दा बलिया दाबेदारका रूपमा चर्चामा छन् । २०५८ देखि सक्रिय राजनीतिक यात्रा सुरु गरेका केसी दुई दशकभन्दा बढी समयदेखि युवा संघ नेपाल र नेकपा (एमाले) को संगठनमा सक्रिय छन्। युवामाझ राजनीतिक चेतना जगाउने, संगठन विस्तार गर्ने र स्थानीय तहमा विकासका पहल अघि बढाउने कार्यमा उनले निरन्तर योगदान पुर्‍याउँदै आएका छन् ।

नेकपा एमालेले पछिल्ला वर्षहरूमा युवा पुस्तालाई उल्लेखनीय रूपमा स्थान दिन थालेको छ । यही धार अन्तर्गत पार्टीले समेत आफुलाई प्राथमिकता राखेर युवा नेता हिमेश केसीलाई अगाडि बढाउने उनको विश्वास छ । केसीको प्राथमिकता सदैव युवा नेतृत्वको विकास र स्थानीय तहमा प्रभावकारी काममार्फत परिवर्तन ल्याउने रहेको छ। “सुखी नेपाली, समृद्ध नेपाल” को राष्ट्रिय लक्ष्यलाई मूर्तरूप दिन युवालाई अवसर, सम्मान र काम गर्ने अनुकूल वातावरण अत्यावश्यक छ भन्ने उनी मान्छन्।

युवाको सक्रियता र क्षमताले मात्र राष्ट्रको दीर्घकालीन स्थिरता र विकास सुनिश्चित गर्न सकिने उनको विश्वास छ। स्थानीय विकासका योजनामा पनि केसीले सडक, आधारभूत संरचना, सामाजिक अभियान र जनसहभागितामूलक कार्यक्रमहरूलाई प्राथमिकता दिएका छन्। केसीले भन्छन्—”नेपालमा दीर्घकालीन समृद्धि युवाको सशक्त सहभागिता बिना सम्भव छैन ।”

युवालाई अवसर, सीप र सम्मान दिने नीति निर्माण गर्नुपर्नेमा उनकाे जाेड छ । त्यस्तै स्थानीय विकासलाई दिगो र जनमुखी बनाउनुपर्ने, देशको समृद्धि लक्ष्यलाई योजनाबद्ध रूपमा अघि बढाउनुपर्नेमा उनकाे विशेष जोड छ । यिनै एजेन्डाले उनी महाधिवेशनमा उम्मेदवारी दिने तयारीमा छन् ।